Cyngor Llyfrau Cymru - Bardd plant Cymru

BARDD PLANT CYMRU Menter sy'n cael ei weinyddu gan S4C, Cyngor Llyfrau Cymru, Urdd Gobaith Cymru a'r Academi yw Bardd Plant Cymru. Y bwriad yw codi proffil barddoniaeth ymysg plant a phobl ifanc a'u hannog i greu a mwynhau barddoniaeth.
BARDD PLANT CYMRU 2008–2009 Ar 27 Mai, ar lwyfan Eisteddfod Genedlaethol Urdd Gobaith Cymru Sir Conwy, trosglwyddodd Caryl Parry Jones mantell Bardd Plant Cymru. Cyhoeddodd mai Bardd Plant Cymru 2008-2009 yw Ifor ap Glyn o Gaernarfon. Dyma gerdd a ysgrifennodd Ifor ap Glyn i Barack Obama, arlywydd newydd yr Unol Daleithiau ar achlysur ei dderbyn yn arlywydd. Camp Obama Daeth niwl ar lannau'r Mississippi gyda'r hwyr, a'r arwyddion neon yn nofio, wedi gollwng angor o’r strydoedd islaw... Ac ar y teledu, yn ôl yn y gwesty daeth hud ar genedl gyfan a chyd-ddathlais y jiwbili fawr wrth i ddyn o’r hen gyfandir gynnig ei obeithion powld i genedl gyfan gyndyn o wynion a chyngaethion... Ond ar sianel arall yng nghannwyll llygad rhyw stadiwm peldroed gwelais gewri duon yn hyt-hyt-hyrddio’n chwyrn i’w gilydd, ac enwau fy hil, yn Evans a Griffiths a Davis a Jones yn warthnod ar eu gwarrau llydan... A champ i’r mab darogan hwn, roi cnawd am esgyrn etholiad, chwythu anadl i’r gobeithion powld, ac impio croen yfory ar greithiau ddoe… Ifor ap Glyn, Bardd Plant Cymru 2008-9 Duffydil (enwyd math newydd o gennin Pedr ar ôl y gantores wych o Nefyn) Hi yw’r petalau melyn cwta, yn siglo’n awgrymog uwch coesyn siapus; un ddiniwed o wyllt; ac yn goron ar y cyfan, gorn o lais a chyfoeth o liw; y llais â graean chwarel Gwylwyr, y llais â llif ac angerdd dyfnderoedd Porthdinllaen... * * * Hi yw blodyn unigrwydd crac mewn pafin Warwick Avenue… yn flodyn unigryw, mor debyg i’r lliaws, ond y hi sy’n lleisio’u hing, yn cyffwrdd miloedd â melyn ei symlrwydd, ag aur ei hathrylith… * * * Achos hi yw’r gwytnwch ddaw i’r golwg yn wylaidd wedi’r hirlwm; a hi yw’r gân annisgwyl ddaw â’r gwanwyn yn ei sgil... Golau yn y gwyll (i T. Llew Jones, bardd plant cyntaf a mwyaf Cymru) Gwelsom cyn hyn ganhwyllau’r rhai hyn, fel tyllau llachar yn nhywyllwch y llan yn gwâdd goleuni mewn o’r tu draw. A gwelsom y rhai iau mewn cyngerdd hwyr yn eglwysig gyda’u leitars, yn patrymu’r nos a’u hangerdd Ond heno yn lloftydd plant ein gwlad gwelwn ddillad gwely’n fryniau dirgel A gwawl od yn dianc dan y plancedi Pe mentrem i grombil y siambrau arallfydol hyn, caem ymhob un blentyn yng nghroth dychymyg; bennau gliniau dan ei ên a thortsh wrth ei drwyn wedi ymgolli’n llwyr yn llyfr T. Llew. Ym Mhontgarreg, mae ffenest y meistr yn dywyll mwy; ond yn llofftydd Cymru heno mae defod anfwriadol y plant yn dyst i’w barhâd, ac mae goleuni eu Gwydion yn dal i ffrydio mewn o’r tu draw… Ifor ap Glyn
BARDD PLANT CYMRU 2007–2008 Ddydd Mawrth, 29 Mai, mewn seremoni ar lwyfan Eisteddfod yr Urdd Sir Gâr, cyhoeddwyd mai Caryl Parry Jones yw Bardd Plant Cymru 2007–2008. Bydd yn ymweld ag ysgolion yn ystod y flwyddyn ac yn cynnal gweithdai barddoniaeth gyda phlant trwy e-bost.
BARDD PLANT CYMRU 2006–2007 Gwyneth Glyn oedd Bardd Plant Cymru 2006–2007.
BARDD PLANT CYMRU 2005–2006 Mererid Hopwood oedd Bardd Plant Cymru 2005–2006.	__

Yn dilyn camp David Davies yng Ngêmau'r Gymanlwad yn Melbourne cyfansoddodd Mererid Hopwood, Bardd Plant Cymru 2005–2006 gerdd arbennig i'w gyfarch ar ei lwyddiant. I Gyfarch y Pencampwr David Davies Gŵyr pawb o Fynwy i Sir Fôn, a phawb drwy'r ddaear gyfan, fod dreigiau'n chwythu mwg a thân a'u bod yn medru hedfan. Ond yn nhre'r Barri, mae 'na un sy'n llawer mwy peryglus na dreigiau'r byd i gyd yn grwn – a'i enw? David Davies! Hwn yw'r ddraig a ddysgodd grefft holl bysgod chwim yr afon, er na all tonnau dyfna'r môr fyth ddiffodd tân ei galon. Mae'n rasio ar adenydd coch, yn rhwydd, yn rhydd mae'n nofio nes llosgi llwybr aur drwy'r pwll, mae'n arwr – mae e'n Gymro! Mererid Hopwood Bardd Plant Cymru 2005–2006
BARDD PLANT CYMRU 2004–2005 Tudur Dylan Jones oedd Bardd Plant Cymru 2004–2005. Bu'n ymweld ag ysgolion yn ystod y flwyddyn ac yn cynnal gweithdai barddoniaeth gyda phlant ar y we.
BARDD PLANT CYMRU 2003–2004 Ceri Wyn Jones oedd Bardd Plant Cymru 2003–2004. Yn ystod y flwyddyn bu'n ymweld ag ysgolion ledled Cymru i annog disgyblion i greu barddoniaeth ac yn cynnal gweithdai ar-lein. Ymhlith uchafbwyntiau'r flwyddyn gellir nodi'r gweithdy penwythnos a gynhaliwyd yng Nghanolfan yr Urdd ym Mhentre Ifan, Sir Benfro, gyda phlant o Ysgol Gynradd Gymraeg Tyle'r Ynn, Llansawel.
MERCH YN FARDD PLANT CYMRU 2002–2003 Menna Elfyn oedd Bardd Plant Cymru 2002–2003. Yn ystod y flwyddyn ysgrifennodd nifer o gerddi ar themâu arbennig, yn ogystal ag ymweld ag ysgolion ledled Cymru i annog disgyblion i greu barddoniaeth. Cyhoeddwyd cyfrol o'r cerddi a luniwyd yn ystod y flwyddyn gan Menna a beirdd ifanc Cymru, o dan y teitl Caneri Pinc ar Dywod Euraid.	__

Bardd Plant Cymru 2001

Mei Mac (Meirion MacIntyre Huws) oedd Bardd Plant Cymru 2001. Ysgrifennodd nifer o gerddi yn ystod y flwyddyn gan deithio o amgylch y wlad yn ymweld ag ysgolion ac yn annog plant i greu barddoniaeth. Ysgrifennodd gerdd newydd,'Y Pethau Bychain', ar gyfer Dydd Gŵyl Dewi 2001. Cyhoeddwyd cyfrol o'r cerddi a luniwyd yn ystod y flwyddyn gan Mei Mac a chyw feirdd Cymru, o dan y teitl Rhedeg Ras Dan Awyr Las.

Bardd Plant Cymru 2000 Myrddin ap Dafydd oedd y person cyntaf erioed i wisgo mantell Bardd Plant Cymru. Yn ystod ei flwyddyn cynhaliodd nifer o weithdai mewn ysgolion ac un yn Stadiwm y Mileniwm. Cyfansoddodd nifer o gerddi ac fe'u cyhoeddwyd yn y gyfrol Jam Coch mewn Pwdin Reis, cerddi Bardd Plant Cymru 2000 a beirdd ifanc Cymru.
	__

^^Top y dudalen

{(}

{)}