Enillwyr Gwobrau'r Diwydiant Cyhoeddi 2007

Cyhoeddwyd enillwyr Gwobrau'r Diwydiant Cyhoeddi yng Nghymru gan Gyngor Llyfrau Cymru mewn seremoni arbennig yn Aberystwyth nos Sadwrn. Cynhaliwyd cinio'r Gwobrau yn y Llyfrgell Genedlaethol fel rhan o raglen dathliadau canmlwyddiant y Llyfrgell yng nghwmni Rhodri Glyn Thomas AC, y Gweinidog dros Dreftadaeth.

Yn ystod y seremoni, fe gyflwynwyd cyfanswm o 18 o wobrau am lyfrau a gyhoeddwyd yn 2005 a 2006, i'r llyfrau a werthodd orau – yn llyfrau Cymraeg a llyfrau Saesneg o Gymru mewn amrywiol gategorïau. Roedd gwobrau hefyd i'r llyfrau a fenthyciwyd amlaf o lyfrgelloedd, yn ogystal â gwobrau am ddylunio a chynhyrchu. Comisiynwyd y gwobrau unigol gan yr artist o Gaerdydd, Carwyn Evans, enillydd Gwobr Ifor Davies yn yr Eisteddfod Genedlaethol eleni.

'Bu'r seremoni yn gyfle i gydnabod gwaith y prif gyhoeddwyr yma yng Nghymru ac i anrhydeddu'r rhai a ddaeth i'r brig,' meddai Gwerfyl Pierce Jones, Cyfarwyddwr y Cyngor Llyfrau. 'Mae'r gwobrau yn adlewyrchu ystod eang y deunydd a gyhoeddir yng Nghymru y dyddiau hyn, yn ogystal â chydnabod safon uchel y cynnyrch. Llwyddiant yr elfennau hyn, ynghyd â nawdd ariannol Llywodraeth y Cynulliad, sydd wedi sicrhau bod y diwydiant cyhoeddi yng Nghymru wedi datblygu cymaint yn y blynyddoedd diwethaf.'

Ategwyd hyn gan Rhodri Glyn Thomas, a ddywedodd: 'Roedd yn bleser cael bod yn bresennol mewn seremoni i gydnabod gwaith y cyhoeddwyr ac mae safon y llyfrau yn cael ei hadlewyrchu yn y cynnydd yng ngwerthiant llyfrau Cymraeg a llyfrau Saesneg o Gymru. Mae gennym draddodiad llenyddol cryf yma yng Nghymru ac mae Llywodraeth y Cynulliad yn falch o gael cefnogi'r diwydiant llyfrau gan gynorthwyo i ddarparu deunydd darllen o'r safon uchaf ar gyfer darllenwyr y dyfodol.'

Darlledir uchafbwyntiau'r seremoni wobrwyo ar raglen Wedi 7, nos Lun, 5 Tachwedd.

Enillwyr Gwobrau Llyfrau Cymraeg:
GWERTHWR GORAU FFUGLEN
Cyhoeddwr: Gwasg Gwynedd
Darnau, Dylan Iorwerth

GWERTHWR GORAU AC EITHRIO FFUGLEN
Cyhoeddwr: Y Lolfa
Gwynfor: Rhag Pob Brad, Rhys Evans

GWERTHWR GORAU BARDDONIAETH
Cyhoeddwr: Gomer
Geiriau a Gerais, T. Llew Jones

GWERTHWR GORAU PLANT
Cyhoeddwr: Gomer
Un Tedi Mas o’r Gwely, Julia Donaldson

LLYFR A FENTHYCIWYD AMLAF O LYFRGELL
Cyhoeddwr: Gomer
Rara Avis, Manon Rhys

DYLUNIO A CHYNHYRCHU
Cyhoeddwr: Cymdeithas Lyfrau Ceredigion
Y Golygiadur, Rhiannon Ifans

LLYFR DARLUNIADOL
Cyhoeddwr: Gomer
Y Mynydd Hwn

DYLUNIO A CHYNHYRCHU (PLANT)
Cyhoeddwr: Y Lolfa
Bili Boncyrs a’r Gêm Bêl-droed, Caryl Lewis/Gary Evans

CYNLLUN CLAWR GORAU’R NADOLIG
Cyhoeddwr: Cymdeithas Lyfrau Ceredigion
Hogan Mam, Babi Jam, Emily Huws

Enillwyr Gwobrau Llyfrau Saesneg:
GWERTHWR GORAU FFUGLEN
Cyhoeddwr: Parthian
The Colour of a Dog Running Away, Richard Gwyn

GWERTHWR GORAU AC EITHRIO FFUGLEN
Cyhoeddwr: Crown House
Imperfectly Natural Woman, Janey Lee Grace

GWERTHWR GORAU BARDDONIAETH
Cyhoeddwr: Seren
Letter to Patience, John Haynes

GWERTHWR GORAU PLANT
Cyhoeddwr: Gomer
The Midwinters, Julie Rainsbury

LLYFR A FENTHYCIWYD AMLAF O LYFRGELL
Cyhoeddwr: Accent
Secrets, Lynne Barrett-Lee

DYLUNIO A CHYNHYRCHU
Cyhoeddwr: Seren
Cecil and Noreen, Patrick Corcoran

LLYFR DARLUNIADOL
Cyhoeddwr: Seren
Return Yn Ôl, Rhodri Jones

DYLUNIO A CHYNHYRCHU (PLANT)
Cyhoeddwr: Pont Books
Dark Tales from the Woods, Daniel Morden

CYNLLUN CLAWR GORAU’R NADOLIG
Cyhoeddwr: Seren
Blue Sky July, Nia Wyn

Am wybodaeth bellach cysylltwch ag Elwyn Jones:
01970 624151 / 07711329448
Cyngor Llyfrau Cymru