Jacqueline Wilson yn ymweld ag Aberystwyth

Bydd yr awdur llyfrau plant poblogaidd, Jacqueline Wilson, yn ymweld ag Aberystwyth ddechrau Gorffennaf, fel rhan o gystadleuaeth llyfrau y Cyngor Llyfrau.

Cynhelir y gystadleuaeth llyfrau Cymraeg yn flynyddol, gydag ysgolion ledled Cymru'n cystadlu. Bydd y disgyblion wedi paratoi cyflwyniad o gyfrol benodol a fydd yn cael ei feirniadu gan Cefin Roberts, Cyfarwyddwr Artistig Theatr Genedlaethol Cymru. Byddant hefyd yn trafod llyfr arall o’u dewis yng nghwmni Gareth Jones, Cyfarwyddwr Addysg a Gwasanaethau Cymunedol, Cyngor Sir Ceredigion. Noddir gwobrau'r gystadleuaeth gan Dr Dewi Davies.

Mae plant Cymru'n gyfarwydd iawn â llyfrau Jacqueline Wilson, gan gynnwys y cyfrolau Candi-Fflos a Ffrindiau Gorau, a addaswyd i'r Gymraeg gan Elin Meek (Gwasg Gomer). Bydd y plant felly’n sicr o fwynhau’r cyfle i ymweld â Chanolfan y Celfyddydau, Aberystwyth, ddydd Mercher, 4 Gorffennaf, i gyfarfod â'r awdur a’i chlywed yn trafod ei gwaith. Bydd yna gyfle hefyd i'r plant glywed awduron eraill yn trafod eu gwaith – sef Elgan Philip Davies, Anwen Francis a Rhian Pierce Jones.

Mae llyfrau Jacqueline Wilson megis The Story of Tracy Beaker, The Suitcase Kid a Totally Cool School Diary wedi dod â sylw rhyngwladol iddi, ynghyd â nifer o wobrau, gan gynnwys Gwobr Smarties. Hyd yn ddiweddar, hi oedd Laureate Plant Prydain. Mae ei llyfrau wedi gwerthu dros 20 miliwn o gopïau ym Mhrydain yn unig.

‘Rydym yn falch iawn ein bod wedi gallu denu Jacqueline Wilson i Aberystwyth. Mae’r cyfieithiadau Cymraeg o’i llyfrau yn hynod boblogaidd, ac fe fydd yn gyfle gwych i blant a rhieni ei chyfarfod,’ meddai Menna Lloyd Williams, Pennaeth Adran Llyfrau Plant y Cyngor Llyfrau. ‘Bydd yn ddiwrnod i'w gofio i ni gyd.’

Gwahoddwyd ysgolion lleol i'r achlysur ac mae yna groeso cynnes i unrhyw un ddod draw i gefnogi'r plant ac i glywed Jacqueline Wilson yn trafod ei gwaith drwy gysylltu ag Adran Llyfrau Plant y Cyngor Llyfrau ar 01970 624151.