| Gwobrau
Tir na n-Og 2006
Cyhoeddodd Cyngor Llyfrau Cymru enwau enillwyr Gwobrau Tir
na n-Og 2006 mewn cinio arbennig yng nghynhadledd 'Cwlwm Celtaidd'
CILIP Cymru a gynhaliwyd yn Amgueddfa Cymru, Caerdydd.
Cyflwynir y gwobrau'n flynyddol gan y Cyngor Llyfrau i anrhydeddu
gwaith awduron ac arlunwyr llyfrau plant mewn tri chategori:
categori cynradd Cymraeg, categori uwchradd Cymraeg a llyfr
Saesneg gorau'r flwyddyn gyda chefndir dilys Cymreig. Noddir
dwy o'r gwobrau gan CILIP Cymru.
Eleni mae gwobrau Tir na n-Og yn dathlu deng mlynedd ar hugain
ers eu sefydlu yn ôl
ym 1976. Dywedodd Menna Lloyd Wililams, Pennaeth Adran Llyfrau
Plant y Cyngor Llyfrau: 'Yn ystod y deng mlynedd ar hugain
gwelwyd datblygiadau aruthrol ym maes cyhoeddi llyfrau plant
yn y ddwy iaith o safbwynt cynnwys a diwyg a'r amrywiaeth
o lyfrau sydd ar gael ar gyfer plant a phobl ifanc.'
1. CATEGORI CYNRADD
CYMRAEG
 Enillydd:
Emily Huws – Carreg Ateb
(Cymdeithas Lyfrau Ceredigion)
Enillydd y wobr yn y categori cynradd yw EMILY HUWS am ei
nofel Carreg Ateb (Cymdeithas Lyfrau Ceredigion), cyfrol ddifyr
a ffres ar gyfer plant 9-11 oed gydag elfennau gwahanol megis
bwlio, y teulu a thechnoleg fodern yn cyd-blethu'n llwyddiannus
ar gefndir hen stori Hugan Goch Fach. Dyma'r pedwerydd tro
i Emily Huws ennill Gwobr Tir na n-Og.
2. CATEGORI UWCHRADD
CYMRAEG
 Enillydd:
Gwion Hallam – Creadyn
(Gwasg Gomer)
Enillydd y wobr
yn y categori uwchradd yw GWION HALLAM am ei nofel Creadyn
(Gwasg Gomer), nofel sy'n llawn cyffro a dioddef wrth i ni
ddilyn bachgen sy'n gorfod ymdopi â byw mewn tŷ
ar drogylch mewn dinas, a hynny ar ôl
cael ei fagu'n hapus ar fferm yng nghefn gwlad. Hon yw nofel
gyntaf Gwion Hallam ar gyfer yr arddegau.
3. Y WOBR SAESNEG
 Enillydd:
Jenny Sullivan – Tirion's Secret Journal
(Gomer/Pont Books)
Dyfarnwyd y wobr am y llyfr Saesneg gorau i JENNY SULLIVAN
am ei nofel Tirion's Secret Journal (Gomer/Pont). Lleolwyd
y nofel hon yn Llancaiach Fawr a cheir ynddi bortread bywiog
a llawn hiwmor o fywyd y cyfoethog a'r tlawd yn yr ail ganrif
ar bymtheg.
Bydd rhaglen hanner awr yn cyflwyno cefndir Gwobrau Tir na
n-Og ac yn anrhydeddu enillwyr eleni yn cael ei darlledu ar
raglen 'Wedi 7' ar S4C nos Lun 29 Mai 2006.
Am ragor o wybodaeth cysyllter ag: Elwyn Jones, Pennaeth Gweinyddiaeth
a Chysylltiadau Cyhoeddus, Cyngor Llyfrau Cymru, Castell Brychan,
ABERYSTWYTH, Ceredigion SY23 2JB T (01970) 624151 F (01970)
625385 E elwyn.jones@cllc.org.uk
|
