HELGARD I ARWAIN TÎM GWERTHU A MARCHNATA LLYFRAU

Penodwyd Helgard Krause yn Bennaeth Gwerthu a Marchnata Cyngor Llyfrau Cymru i arwain y gwaith o hyrwyddo llyfrau o Gymru, yn y ddwy iaith.

Yn enedigol ô'r Almaen, cafodd Helgard ei magu yn ardal Rheinland Pfalz, mewn tref fechan ar y ffin â Ffrainc. Graddiodd mewn gwleidyddiaeth ym Mhrifysgol Berlin cyn dilyn cwrs mewn llenyddiaeth Saesneg ym Mhrifysgol Sussex ym 1993.

Mae hi wedi gweithio i sawl cwmni ym maes cyhoeddi, gan gynnwys Routledge a chwmni dosbarthu yn Rwsia. Yn ddiweddarach ymunodd â chwmni cyhoeddi Rotovision, gan ddod yn Bennaeth Gwerthu a Hawlfreintiau ac arwain eu cynlluniau marchnata yn Tsieina, Siapan, Awstralia ac America.

Symudodd i fyw i Gymru yn 2002, pan gafodd ei phenodi'n Swyddog Marchnata Tramor i'r Cyngor Llyfrau. Yn dilyn dwy flynedd o hyrwyddo llyfrau Cymru ar draws y byd, fe'i penodwyd i'r swydd newydd hon yn arwain y tîm gwerthu a marchnata.

Yn ôl Gwerfyl Pierce Jones, Cyfarwyddwr y Cyngor Llyfrau, "Mae'r penodiad hwn yn rhan o gyfres o ddatblygiadau sy'n deillio o adroddiad gan ymgynghorwyr annibynnol (Kewley/Richardson) ar wasanaeth cynrychiolaeth y Cyngor Llyfrau. Mae gan Helgard brofiad eang o'r fasnach lyfrau, a bydd y profiad gwerthfawr hwnnw bellach yn cael ei sianelu i ddatblygu'r diwydiant llyfrau yma yng Nghymru."

A hithau eisoes yn rhugl mewn Almaeneg, Saesneg a Ffrangeg ac yn siarad peth Rwsieg mae Helgard bellach wedi ymroi i ddysgu Cymraeg. Bu ar gwrs Wlpan yn ystod Haf 2005, ac ar ôl ei phenodi cafodd ei rhyddhau o'i swydd am gyfnod i ddysgu ac ymarfer yr iaith.

"Dwi ddim yn meddwl bod dysgu Cymraeg yn anodd," meddai Helgard, "ond efallai fod y ffaith fy mod yn Almaenes yn ei gwneud hi'n haws gan fy mod yn gyfarwydd â dysgu ieithoedd ac yn hoff o astudio gramadeg. Mae fy nhiwtoriaid -Carwen Fychan a Llinos Dafis - wedi bod yn ardderchog. Dwi ddim yn credu y byddwn wedi dysgu mor gyflym heb eu cymorth nhw. Erbyn hyn dwi'n edrych ymlaen at ddechrau yn fy swydd newydd a chydweithio gyda'n partneriaid i hyrwyddo'r llyfrau gwych a geir yng Nghymru."

Dywedodd yr Athro M. Wynn Thomas, Cadeirydd y Cyngor Llyfrau, "Wrth groesawu Helgard i'r swydd bwysig hon, rydym yn awyddus i fanteisio ar ei phrofiad o'r diwydiant llyfrau ar lefel ryngwladol. Mae'n rhyfeddod i mi fel y mae'r diwydiant llyfrau yng Nghymru wedi datblygu dros y blynyddoedd, ac yn wir, yn dal i ddatblygu ar hyn o bryd. Mae'n glod i'r awduron, cyhoeddwyr a'r llyfrwerthwyr, yn ogystal â'r Cyngor ei hun, bod gennym ddiwydiant llyfrau ffyniannus y gallwn i gyd fod yn falch ohono ac y gallwn edrych ymlaen i gyfnod cyffrous arall o ddatblygu a thwf gyda'n gilydd."

Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, Aberystwyth, Ceredigion SY23 2JB T (01970) 624151 F (01970) 625385 E elwyn.jones@cllc.org.uk