Gwobrau Tir na n-Og 2005
 
Cyhoeddodd Cyngor Llyfrau Cymru enwau enillwyr Gwobrau Tir na n-Og 2005.
 
Enillydd y wobr am Ffuglen Orau’r Flwyddyn yw EMILY HUWS am y nofel Eco (Cymdeithas Lyfrau Ceredigion), nofel llawn tynerwch ar gyfer plant 9-12 oed.  Yn y nofel cawn ddarllen am y tensiynau ym mywyd cythryblus eco-ryfelwraig a’i merch. Dyma’r trydydd tro i Emily Huws ennill Gwobr Tir na n-Og.
 
Rhoddwyd Clod Arbennig hefyd i’r gyfrol I’r Tir Tywyll, Elgan Philip Davies (Cymdeithas Lyfrau Ceredigion).
 
Y gyfrol sy’n ennill y wobr am Lyfr Gorau’r Flwyddyn ac eithrio Ffuglen yw Byd Llawn Hud (Gwasg Gomer), cyfrol ddeniadol gan feirdd cyfoes (TUDUR DYLAN, SONIA EDWARDS, CERI WYN JONES, MERERID HOPWOOD ac ELINOR WYN REYNOLDS) wedi’i darlunio gan CHRIS GLYNN.  Mae’r gyfrol hon, i ddarllenwyr 7-9 oed, yn cynnwys cerddi newydd a doniol am berthynas plant â byd natur, ffrindiau a theulu. Cyhoeddwyd y gyfrol dan nawdd Cynllun Cyhoeddiadau Cyd-bwyllgor Addysg Cymru.
 
Dyfarnwyd y wobr am y llyfr Saesneg gorau i JACKIE MORRIS, am y llyfr stori-a-llun, The Seal Children (Frances Lincoln) stori hudolus wedi ei darlunio'n chwaethus i ddarllenwyr 7-9 oed.  Mae’n adrodd chwedl werin am hanner-gwraig a hanner-morlo sy'n dwyn gwaredigaeth i drigolion penrhyn unig wrth iddi gyflwyno trysor o wely'r môr iddynt. Dyma’r eildro i Jackie Morris ennill Gwobr Tir na n-Og.
 
‘Eleni eto, roedd tasg anodd yn wynebu’r detholwyr,’ meddai Menna Lloyd Williams, Pennaeth Adran Llyfrau Plant Cyngor Llyfrau Cymru. ‘Roedd yna gynhaeaf toreithiog o lyfrau i’w hystyried a’r rheiny’n adlewyrchu safon uchel llyfrau plant yng Nghymru heddiw. Mae’r enillwyr a’u cyhoeddwyr i’w llongyfarch yn fawr iawn.’
 
Cyflwynir Gwobrau Tir na n-Og yn flynyddol gan y Cyngor Llyfrau a CILIP Cymru i anrhydeddu gwaith awduron ac arlunwyr llyfrau plant. Bydd yr enillwyr yn cael eu hanrhydeddu yn yr hydref.
 
Am ragor o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus,  Cyngor Llyfrau Cymru, Castell Brychan, ABERYSTWYTH, Ceredigion  SY23 2JB T (01970) 624151  F (01970) 625385  elwyn.jones@cllc.org.uk