1 Medi 2003

J. K. ROWLING YN CEFNOGI CLWB LLYFRAU SBONDONICS!
 
Daeth cyfle unigryw i un ysgol yng Nghymru ennill copi o Harri Potter a Maen yr Athronydd wedi ei lofnodi gan neb llai na J. K. Rowling ei hun! 
 
Mae’r cyhoeddwyr Saesneg yn ffyddiog mai hwn fydd yr unig gopi o’i fath, ac mae’n debygol y bydd yn werth arian ac yn hynod o gasgladwy ymhen amser.  Felly, bydd yn fuddsoddiad gwych i’r ysgol fuddugol!
 
Ac mae’r wobr ar gael yn unig i’r ysgolion hynny sy’n perthyn i Glwb Llyfrau Sbondonics! Yr her i’r ysgolion fydd sicrhau fod y ganran uchaf posibl o’u disgyblion Blwyddyn 5 a 6 yn prynu llyfrau trwy’r Clwb yn nhymor yr hydref eleni.
 
Sbondonics yw’r Clwb Llyfrau Cymraeg ar gyfer plant 7 i 11 oed a drefnir gan Gyngor Llyfrau Cymru.  Mae dros 70,000 o daflenni gwerthu lliwgar y Clybiau Llyfrau – Sbri-di-ri a Sbondonics – yn cael eu dosbarthu bob tymor i blant ym mhob cwr o Gymru.  Yn 2002–2003, gwerthwyd dros 23,000 o lyfrau trwy’r clybiau, gan ddod â chyfanswm y gwerthiant i fwy na £100,000 am y tro cynta erioed.
 
‘Mae’n braf medru defnyddio enw sydd mor adnabyddus i blant ac oedolion ledled Prydain i hybu llyfrau Cymraeg,’ meddai Delyth Humphreys, Swyddog Clybiau Llyfrau Plant y Cyngor Llyfrau.  ‘Mae’r gystadleuaeth hon wedi’n galluogi i roi sylw ychwanegol i’r holl lyfrau gwych sydd ar gael trwy Sbondonics.  Rydym wedi darparu pytiau blasus o nifer ohonyn nhw er mwyn annog y plant i brynu a darllen llyfrau Cymraeg.’
 
Bydd manylion llawn am y gystadleuaeth a thaflenni gwerthu Sbondonics yn cyrraedd yr ysgolion yn ystod wythnos gyntaf Medi.  Mae croeso i unrhyw ysgol sydd â diddordeb yn y cynllun i gysylltu â Delyth Humphreys ar 01970 624151 neu trwy e-bost delyth.humphreys@cllc.org.uk. 
 
Bydd enw’r ysgol fuddugol yn cael ei dynnu o het, ddydd Llun 5 Ionawr 2004.