Cyfres Library of Wales

Cafodd y teitlau diweddaraf yng nghyfres Library of Wales eu lansio yng Nghaerdydd, ym mhresenoldeb Alun Pugh, y Gweinidog dros Ddiwylliant, y Gymraeg a Chwaraeon. Roedd cyhoeddi'r teitlau newydd hyn yn fodd i ddathlu treftadaeth lenyddol Cymru yn yr iaith Saesneg.

'Mae'r gyfres yn llenwi bwlch pwysig yn ein hanes diweddar, ac yn rhan o'r drafodaeth barhaol am hunaniaeth a diwylliant y Cymry,' meddai Alun Pugh.

Y pedair cyfrol a gyhoeddwyd oedd Ash on a Young Man's Sleeve, Dannie Abse; A Man's Estate, Emyr Humphreys; In the Green Tree, Alun Lewis a Home to an Empty House, Alun Richards.

Yn dilyn y lansiad yng Nghaerdydd, fe drefnwyd digwyddiad cyffelyb yn Nhy'r Cyffredin yn Llundain yng nghwmni Dr Hywel Francis AS, Cadeirydd y Pwyllgor Dethol Cymreig.

'Mae Cymru yn wlad fechan gydag etifeddiaeth ddiwylliannol a thraddodiad llenyddol yn ymestyn dros gyfnod maith. Hyd yn hyn, mae cyfres Library of Wales wedi bod yn llwyddiant ysgubol – yn fasnachol a hefyd o ran y nod o gyflwyno llyfrau a fu allan o brint i gynulleidfaoedd newydd o ddarllenwyr. Rwy'n hynod falch fod penderfyniad Llywodraeth y Cynulliad i gefnogi'r gyfres wedi cael ei brofi'n gywir,' ychwanegodd Alun Pugh.

Fel rhan o raglen 'Literary Lights' Frazer Cains, bu Alun Pugh a'r Athro Dai Smith, golygydd y gyfres, yn ymweld â chanolfan Gymraeg Llundain yn Grays Inn Road i roi sylw pellach i'r gyfres.

Mae'r gyfres wedi bod yn llwyddiant ysgubol, gyda dros 12,000 o gopïau o'r teitlau cyntaf eisoes wedi eu gwerthu. Bu hefyd yn llwyddiant yn yr Unol Daleithiau. Fel rhan o ymweliad cwmni Parthian ag Efrog Newydd yn gynharach eleni, cyflwynodd Alun Pugh set o'r llyfrau i Alan Pally o Lyfrgell Gyhoeddus Efrog Newydd.

I gyd-fynd â'r gyfres mae pecyn addysgol wedi ei baratoi i gynorthwyo athrawon i gyflwyno ysgrifennu Saesneg o Gymru yn y dosbarth. Mae'r pecyn yn cynnwys syniadau am weithgareddau fydd yn:

• cyflwyno'r llyfrau yn eu gyd-destun cymdeithasol a hanesyddol
• annog trafodaeth a chyflwyniadau llafar
• cynorthwyo'r disgyblion i adnabod y prif themâu.

Paratowyd y pecyn addysg gan Hayley Long, sy'n hanu o Ipswich. Mae hi bellach yn byw yng Nghaerdydd ac yn athrawes Saesneg yn Ysgol Uwchradd yr Eglwys Newydd.

'Mae'n bwysig bod plant ac oedolion yng Nghymru yn cael mynediad i lenyddiaeth sy'n rhan o'u profiad ac sy'n adlewyrchu eu bywyd a'u hetifeddiaeth. Mae'r pecyn addysg a baratowyd gan yr athrawes Saesneg brofiadol Hayley Long yn arf pwysig i ddod â'r clasuron i'r dosbarth ac i annog trafodaeth rhwng disgyblion am eu diwylliant,' meddai Alun Pugh.

Ychwanegodd yr Athro M. Wynn Thomas, Cadeirydd Cyngor Llyfrau Cymru: 'Mae llwyddiant y gyfres arbennig hon wedi bod yn neilltuol – mewn termau gwerthiant, sylw gan y cyhoedd a'r cyfryngau a hefyd yn safon y llyfrau. Mae'r llwyddiannau hyn yn arwydd o dwf a datblygiad cyhoeddi Saesneg yng Nghymru, fel y'i hyrwyddir gan Gyngor Llyfrau Cymru gyda chefnogaeth Llywodraeth Cynulliad Cymru. Mae'r gyfres Library of Wales yn rhan ganolog o'r sylw cynyddol a roddir i ysgrifennu Saesneg o Gymru. Wedi blynyddoedd o ddiffyg sylw, mae dyfodol ysgrifennu Saesneg o Gymru – boed y clasuron neu ysgrifennu newydd – yn edrych yn llewyrchus iawn.'