1 Tachwedd 2003
 
GWOBRAU TIR NA N-OG

Cyhoeddwyd enwau enillwyr gwobrau Tir na n-Og 2003 yn fyw heddiw (31 Hydref) ar y rhaglen deledu ‘Gwobrau Tir na n-Og 2003’ ar S4C.
 
Enillydd Ffuglen Orau’r Flwyddyn yw BETHAN GWANAS am y gyfrol Sgôr (Y Lolfa), nofel ddifyr, ddarllenadwy iawn, yn llawn hiwmor ar gyfer yr arddegau am fachgen yn symud i fyw o’r gogledd i’r de.
 
Enillwyr y wobr am Lyfr Gorau’r Flwyddyn ac eithrio Ffuglen yw RHIANNON IFANS a MARGARET JONES am y gyfrol Dewi Sant (Y Lolfa), cyfrol arbennig o safonol sy’n gyfuniad o storïau am fywyd Dewi Sant gyda darluniau a diwyg sy’n gweddu i’r cyfnod. 
 
Dyma’r ail dro i Bethan Gwanas ennill gwobr Tir na n-Og.  Yn 2001 enillodd y wobr am ei nofel Llinyn Trôns. Mae Rhiannon Ifans hefyd wedi ennill gwobr Tir na n-Og o’r blaen.  Yn 2000 enillodd hi a Margaret Jones gyda’r gyfrol Chwedlau o’r Gwledydd Celtaidd.  Margaret Jones yw arlunydd Dewi Sant, a dyma’r pedwerydd tro iddi hi ennill gwobr Tir na n-Og.
 
Dyfarnwyd y wobr am y llyfr Saesneg gorau i ROB LEWIS am y llyfr stori-a-llun, Cold Jac (Pont/Gomer), nofel wedi’i lleoli ar fferm yng Nghymru.  Ganed Rob Lewis yn Llundain a bu’n astudio Dylunio Graffig yng Ngholeg Politechnig Bryste.  Mae’n awr yn byw ar fferm ger Llandrindod.
 
‘Roedd tasg anodd iawn yn wynebu’r beirniad eto eleni,’ meddai Menna Lloyd Williams, Pennaeth Adran Llyfrau Plant y Cyngor Llyfrau.  ‘Y mae’r llyfrau sydd wedi cyrraedd y brig yn arwydd o safon arbennig llyfrau plant yng Nghymru y dyddiau hyn a hefyd o’r ystod eang o lyfrau sydd ar gael.  Rydym yn hynod falch o gael llongyfarch yr enillwyr yn wresog ar eu camp.’
 
Cyflwynir gwobrau Tir na n-Og yn flynyddol gan y Cyngor Llyfrau i anrhydeddu gwaith awduron ac arlunwyr llyfrau plant.  Yn dilyn y cyhoeddiad ar y rhaglen deledu ‘Gwobrau Tir na n-Og 2003’ heddiw, fe fydd yr enillwyr hefyd yn cael eu hanrhydeddu yn ystod Cynhadledd Llyfrau Plant y Cyngor Llyfrau 7 – 9 Tachwedd 2003) yng ngwesty’r Metropole, Llandrindod.
 
Am fanylion pellach cysyllter ag:  Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, Aberystwyth, Ceredigion SY23 2JB
T (01970) 624151  F (01970) 625385  elwyn.jones@cllc.org.uk