31
Mawrth, 2004
Y CYNGOR LLYFRAU'N CROESAWU ADRODDIAD Y CYNULLIAD
AR YSGRIFENNU SAESNEG YNG NGHYMRU
Croesawodd Cyngor Llyfrau Cymru adroddiad Pwyllgor Diwylliant
y Cynulliad ar Ysgrifennu Saesneg yng Nghymru a gyhoeddwyd
heddiw (Dydd Mercher 31 Mawrth) gan nodi ei fod yn gyfraniad
pwysig i'r drafodaeth ar ddatblygu'r maes pwysig
hwn yng Nghymru.
'Roeddem yn hynod falch fod y Pwyllgor Diwylliant,
dan gadeiryddiaeth Rosemary Butler AC, wedi penderfynu
ymgymryd â'r adolygiad polisi hwn,' meddai
Dr Lionel Madden, Cadeirydd y Cyngor Llyfrau, 'yn
enwedig gan iddo ddigwydd yn dynn ar sodlau'r penderfyniad
i drosglwyddo'r cyfrifoldeb am gyhoeddi Saesneg o
Gyngor y Celfyddydau i'r Cyngor Llyfrau.'
Ychwanegodd Gwerfyl Pierce Jones, Cyfarwyddwr y Cyngor
Llyfrau 'Derbyniodd y Pwyllgor dystiolaeth o safon
uchel – yn ysgrifenedig ac ar lafar – gan gynrychiolwyr
o'r sector gyhoeddi, yn cynnwys awduron, cyhoeddwyr,
llyfrgellwyr ac addysgwyr, yn ogystal â'r Cyngor
Llyfrau ei hun. Y mae'n amlwg bod aelodau'r
pwyllgor wedi deall a gwerthfawrogi'r her sy'n
wynebu'r sector. Does dim amheuaeth y byddai'r
argymhellion, o'u gweithredu yn eu cyfanrwydd, yn
gallu trawsnewid Ysgrifennu Saesneg yng Nghymru.'
Fel y noda'r adroddiad, yr oedd cytundeb lwyr ymysg
y cyfranwyr ar bwysigrwydd a chyfraniad ysgrifennu Saesneg
yng Nghymru i ddiwylliant Cymru.
'Mae awduron y Gymru fodern yn cyfrannu'n sylweddol
at ddiwylliant y genedl,' meddai'r Athro M.
Wynn Thomas, Cyfarwyddwr CREW (Canolfan Ymchwil i Lên
ac Iaith Saesneg Cymru) a Chadeirydd Panel Grantiau Cyhoeddi
(Saesneg) y Cyngor Llyfrau. 'Drwyddynt hwy
y mae Cymru yn mynegi'i hun iddi'i hun ac i'r
byd. Bellach, am y tro cyntaf, mae'r Gymru
amlddiwylliannol yn nodi'n gyhoeddus bwysigrwydd
ysgrifennu Saesneg gan gyhoeddi adroddiad sy'n cefnogi
eu gwaith. Hyderir y bydd y weledigaeth a ddangoswyd
gan y Pwyllgor Diwylliant, drwy gydnabod cryfder diwylliant
mwyafrif pobl Cymru, yn trosglwyddo'n weithredu cadarnhaol
gan Lywodraeth y Cynulliad a'i Gweinidogion.'
Mae'r Cyngor Llyfrau'n hynod falch fod yr adroddiad
yn rhoi'r prif sylw i gefnogi a datblygu holl strwythur
y sector gyhoeddi. Y mae'r elfennau hyn yn
cynnwys:
- arian comisiynu i awduron
- cryfhau strwythurau'r tai cyhoeddi
- buddsoddi mewn marchnata
- annog siopau llyfrau i arddangos a hyrwyddo'r llyfrau.
Yn ogystal â'r uchod, mae'r adroddiad
yn nodi cyfraniad pwysig llyfrgelloedd a'r sector
addysg i hyrwyddo llyfrau Saesneg o Gymru i ddarllenwyr
newydd. Mae'r Adroddiad hefyd yn nodi pwysigrwydd
Gwobrau Llyfrau i hyrwyddo'r llyfrau gorau o Gymru
a'r angen i gadw'r 'clasuron' mewn
print.
'Y mae'r Cyngor Llyfrau yn ffyddiog y bydd y
diwydiant cyhoeddi yng Nghymru yn ymateb yn bositif i'r
adroddiad hwn,' meddai Gwerfyl Pierce Jones.
'Rydym hefyd yr un mor sicr y bydd holl sectorau'r
diwydiant cyhoeddi yn falch o'r cyfle i gydweithio
â'r Cynulliad i sicrhau bod yr argymhellion
yn cael eu gweithredu. Drwy gydweithio â'n
gilydd gallwn sicrhau bod ysgrifennu Saesneg o Gymru'n
cael y sylw y mae'n ei haeddu.'
Yn ystod lansio'r adroddiad fe gyhoeddodd W H Smith
y bydd eu holl siopau cadwyn yng Nghymru yn rhoi mwy o
sylw i lyfrau Saesneg o Gymru o hyn ymlaen. Bydd
cynllun Llyfr y Mis W H Smith yn cael ei lansio yn eu
siopau yng Nghymru ac yn ogystal byddant yn arddangos
adran arbennig o lyfrau Saesneg o Gymru. Fe nodwyd
hefyd bod siopau cadwyn eraill yn ystyried ehangu eu detholiad
o lyfrau Saesneg o Gymru.
Am ragor o wybodaeth, cysylltwch ag Elwyn Jones, Pennaeth
Gweinyddiaeth a Chysylltiadau Cyhoeddus, Cyngor Llyfrau
Cymru, Castell Brychan, ABERYSTWYTH, Ceredigion
SY23 2JB T (01970) 624151 F (01970) 625385
elwyn.jones@cllc.org.uk |
|
