APWYNTIO PENNAETH GWEINYDDIAETH A CHYSYLLTIADAU CYHOEDDUS
 
Yn ddiweddar, penodwyd Elwyn Jones yn Bennaeth Gweinyddiaeth a Chysylltiadau Cyhoeddus Cyngor Llyfrau Cymru.  Y mae'n hen gyfarwydd â gwaith y Cyngor gan ei fod wedi gweithio am bedair blynedd yn yr Adran Farchnata yno.
 
Fel Swyddog Marchnata yr oedd yn gyfrifol am ddatblygu cynlluniau hyrwyddo, ond bellach ef fydd yn gyfrifol am weinyddiaeth fewnol y Cyngor yn ogystal â datblygu delwedd gyhoeddus y sefydliad.
 
'Y mae'n gyfnod cyffrous iawn i'r diwydiant llyfrau yng Nghymru,' meddai Mr Jones.  'Gyda strwythurau newydd o ariannu'r Cyngor wedi eu cyflwyno gan y Cynulliad Cenedlaethol, rydym yn sicr y bydd holl sectorau'r fasnach lyfrau yn cydweithio â'i gilydd i ddatblygu a hyrwyddo'r ddarpariaeth o lyfrau i'r darllenwyr.'
 
Yn enedigol o'r Bala, fe ddilynodd Elwyn Jones gwrs hyfforddi athrawon yng Ngholeg y Drindod, Caerfyrddin, cyn ymuno ag Urdd Gobaith Cymru yn Aberystwyth.  Bu am bedair blynedd ar ddeg yn gweithio gyda chwmni cysylltiadau cyhoeddus Stratamatrix, ac yn Gyfarwyddwr y cwmni gyda chyfrifoldeb am rai o brif glientau'r cwmni ledled Cymru.
 
'Rwy'n sicr y bydd fy mhrofiad o weithio yn yr Adran Farchnata, a'm hadnabyddiaeth o waith y Cyngor, yn sylfaen dda i mi ar gyfer fy swydd newydd,' ychwanegodd Mr Jones.  'Ein nod bob amser yw sicrhau'r ddarpariaeth orau bosib o lyfrau o Gymru, gan fanteisio ar bob cyfle i hyrwyddo gwerthiant y llyfrau, ac i hybu darllen yn gyffredinol.'
 
Am fwy o wybodaeth cysylltwch ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, Aberystwyth, Ceredigion  SY23 2JB

T: (01970) 6241510 F: (01970) 625385 elwyn.jones@cllc.org.uk