11 Rhagfyr 2002

LLYFRAU O GYMRU I BEDWAR BAN BYD
 
Beth yw’r cysylltiad rhwng Mozambique, Yr Almaen, Qatar a Chaerdydd?
 
Yn fuan iawn, fe fydd y daflen Books from Wales – a gyhoeddwyd ar y cyd rhwng y Cyngor Llyfrau a’r Cyngor Prydeinig – i’w gweld ym mhob un o’r mannau uchod.  Nod y daflen yw hyrwyddo llyfrau o Gymru ac fe’i dosberthir drwy swyddfeydd y Cyngor Prydeinig ledled byd.  Erbyn hyn mae ganddynt swyddfeydd mewn 218 o drefi a dinasoedd mewn 109 o wledydd.
 
‘Dyma’r tro cyntaf i’r Cyngor Llyfrau gydweithio’n ffurfiol â’r Cyngor Prydeinig yng Nghymru ac rydym yn falch iawn o’r cyfle i wneud hyn,’ meddai Elwyn Williams, Swyddog Cynllun Ymestyn y Cyngor.  ‘Mae’n gyfle gwych i gyrraedd cynulleidfa newydd ac i dynnu sylw’r byd at y toreth o lyfrau safonol yn yr iaith Saesneg a gyhoeddir gan gyhoeddwyr o Gymru.’
 
Mae’r daflen liwgar yn cyfeirio at oddeutu 90 o deitlau amrywiol ym meysydd gwleidyddiaeth a chymdeithas, diwylliant, hanes, llenyddiaeth a phobl.  Mae’r daflen hefyd yn rhoi sylw i wefan gwales.com fel ffordd syml o gael yr wybodaeth ddiweddaraf am lyfrau o Gymru.
 
‘Rydym yn gobeithio yn fawr y bydd yr arbrawf yma yn llwyddiannus,’ ychwanegodd Elwyn Williams, ‘ac y byddwn yn cydweithio â’n gilydd eto y flwyddyn nesaf, gan anelu at adeiladu perthynas tymor-hir er lles y diwydiant cyhoeddi yng Nghymru.’