30 Gorffennaf, 2001
CYFNOD YNG NGHARCHAR BIWMARES!

Cafodd dwy ysgol yn y gogledd orchymyn i fynd i Garchar Biwmares yn ddiweddar i dderbyn gwobrau arbennig gan y Cyngor Llyfrau. Dyma'r lleoliad a ddewiswyd i wobrwyo'r ysgolion a ddaeth i'r brig yng nghystadleuaeth Diwrnod y Llyfr 2001. Y gamp i'r ysgolion oedd cyplysu dathliadau Diwrnod y Llyfr a Dydd Gŵyl Dewi, gan fod y ddau yn cyd-daro eleni. Darlledwyd yr achlysur yn fyw ar raglen Heno, gyda'r cyflwynydd Daloni Metcalf yn cyflwyno'r gwobrau o lyfrau gwerth £500 yr un i Ysgol Gynradd Llanfairpwll ac Ysgol Uwchradd Botwnnog.

Fe drefnwyd yr ymweliad drwy gydweithrediad Adran Hamdden a Threftadaeth Ynys Môn, ac fel rhan o'r ymweliad fe gafodd y disgyblion eu tywys ar daith o gwmpas y carchar, cyn ymuno â Mei Mac, Bardd Plant Cymru, mewn gweithdy barddoniaeth.

Doedd gan y beirniad, Gareth William Jones, ond canmoliaeth i'r holl ysgolion oedd wedi cystadlu gan nodi: 'Mae'n amlwg bod pob diwrnod yn "ddiwrnod y llyfr" yn yr ysgolion fu'n cystadlu eleni gan fod yr adroddiadau a dderbyniais yn dangos cymaint o bwysigrwydd a roddir i lyfrau gan yr ysgolion.'

Ychwanegodd Delyth Humphreys: 'Er mai dwy ysgol yn unig oedd yn cael eu gwobrwyo, rydym yn sicr bod pob ysgol a gymerodd ran wedi cael mwynhad o'r gweithgareddau, ac fe allwn yn awr edrych ymlaen at ddathlu Diwrnod y Llyfr y flwyddyn nesaf ar ddydd Iau, 14 Mawrth 2002.'