1 Mawrth 2005

LLEWYRCH Y CLYBIAU LLYFRAU

Mae’r clybiau llyfrau – Sbri-di-ri a Sbondonics – yn mynd o nerth i nerth y dyddiau hyn, gyda gwerthiant y tymor diwethaf wedi profi yr uchaf erioed.
 
Mae’r clybiau, a weinyddir gan y Cyngor Llyfrau, yn cael eu trefnu drwy’r cylchoedd meithrin a’r ysgolion cynradd, gan roi cyfle i bob plentyn brynu llyfrau o’u dewis.  Diolch i frwdfrydedd athrawon ledled Cymru, fe sicrhawyd archebion gwerth £37,000 yn ystod tymor yr Hydref.
 
‘Oherwydd y dewis gwych o lyfrau oedd wedi eu cynnwys yn y taflenni a ddosbarthwyd, rydym wedi llwyddo’n rhyfeddol i gynyddu’r gwerthiant unwaith eto,’ meddai Delyth Humphreys ar ran y Cyngor Llyfrau.  ‘Mae’n amlwg bod athrawon a rhieni yn gwerthfawrogi’r cyfle i sicrhau llyfrau i’r plant, ac y mae’r plant eu hunain hefyd yn mwynhau’r darllen.’
 
Er mwyn sicrhau bod y cynnydd yn cael ei gynnal, mae’r Cyngor Llyfrau yn cynnig tocynnau llyfrau gwerth £5 yr un i’r 500 cyntaf sy’n prynu llyfrau y tymor hwn.  Cyfle gwych, felly, i’r plant fwynhau rhagor o lyfrau!
 
Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion  SY23 2JB T (01970) 624151 F (01970) 625385 E elwyn.jones@cllc.org.uk