30 Tachwedd 2001

CYHOEDDI TREFN ARIANNU NEWYDD I’R CYNGOR LLYFRAU

Cyhoeddodd Gwerfyl Pierce Jones, Cyfarwyddwr Cyngor Llyfrau Cymru, heddiw
(30 Tachwedd) fod y Cynulliad Cenedlaethol wedi cytuno i symleiddio’r modd y mae’r Cyngor Llyfrau’n derbyn ei arian craidd o’r flwyddyn nesaf ymlaen.

Bellach, fe fydd y Cyngor Llyfrau yn derbyn ei arian craidd o un ffynhonnell yn unig, sef y Cynulliad Cenedlaethol, gan resymoli’r drefn bresennol o dderbyn arian o’r Cynulliad Cenedlaethol (83%) yn ogystal â gwneud ceisiadau i’r ddau ar hugain o Awdurdodau Lleol unigol (17%).

Cyhoeddwyd y trefniant newydd yn ystod Cyfarfod Blynyddol y Cyngor Llyfrau a gynhaliwyd eleni yn Aberaeron, ar wahoddiad Cyngor Sir Ceredigion, gyda’r Cyngor Llyfrau yn dathlu deugain mlynedd o ddarparu gwasanaeth i’r fasnach lyfrau yng Nghymru. Sefydlwyd y Cyngor yn 1961, pan ddaeth y Cymdeithasau Llyfrau lleol at ei gilydd i sefydlu un corff cenedlaethol.

‘Rydym yn sicr y bydd y trefniant newydd yma yn gosod y Cyngor ar seiliau ariannol cadarnach, fel y gallwn gynllunio’n gwaith yn well ar gyfer y dyfodol,’ meddai Gwerfyl Pierce Jones. ‘Er hyn, rydym yn awyddus i barhau’r bartneriaeth agos sydd rhyngom a’r Awdurdodau Lleol ledled Cymru, ac fe fyddant yn parhau i gael eu cynrychioli ar ein pwyllgorau canolog.’

Yn ystod y flwyddyn ddiwethaf, bu’r Cyngor hefyd yn llwyddiannus wrth ddenu arian ychwanegol i ddatblygu nifer o gynlluniau newydd i hyrwyddo a hybu llyfrau. Ymhlith y cynlluniau hyn roedd y gwaith o gomisiynu adolygiadau o lyfrau i’w gosod ar wefan y Cyngor www.gwales.com, yn ogystal â gwahodd papurau a chylchgronau i’w cyhoeddi.

‘Mae gennym nod o baratoi 500 o adolygiadau erbyn diwedd y flwyddyn ariannol hon,’ meddai Gwerfyl Pierce Jones, ‘ac rydym yn falch o gael nodi ein bod wedi croesi’r hanner ffordd. Rydym hefyd yn falch bod darllenwyr yn gwerthfawrogi’r gwasanaeth yma, a’r datblygiad nesaf fydd rhoi cyfle iddynt ychwanegu eu sylwadau eu hunain ar y llyfrau.’

Dau gynllun arall sydd ar y gweill yw, yn gyntaf, cynllun peilot i sefydlu cylchoedd darllen lleol mewn cydweithrediad ag Awdurdodau Llyfrgell yng Nghonwy, Ceredigion a Chastell-nedd Port Talbot. Mae’r cynllun yn cael ei gynnal yn ystod y gaeaf eleni, a bydd yn cael ei fonitro’n ofalus gyda’r gobaith o’i ehangu yn y dyfodol. Mae’r ail gynllun wedi ei dargedu’n arbennig i ddenu pobl ifanc, yn enwedig bechgyn, i ddarllen mwy o lyfrau, ac fel rhan o’r cynllun trefnwyd taith gan gr<eth>p theatr-mewn-addysg i nifer o ysgolion ledled Cymru.

Nododd Gwerfyl Pierce Jones bod llwyddiant y Cyngor i ddenu arian prosiect yn parhau, gan adrodd bod y Cyngor wedi derbyn arian ychwanegol gan y Cynulliad Cenedlaethol ar gyfer y flwyddyn ariannol nesaf i hybu llyfrau o Gymru dramor.

Wrth gyflwyno’r adroddiad blynyddol ar gyfer 2000/2001 i aelodau’r Cyngor, nododd Gwerfyl Pierce Jones bod yr adroddiad ariannol yn dangos cynnydd unwaith eto yng ngwerthiant y Ganolfan Ddosbarthu, gyda’r cyfanswm 8% yn uwch na’r flwyddyn flaenorol.

‘Yn ogystal â bod yn falch o’r gwasanaethau rydym yn eu cynnig i’r cyhoeddwyr a’r llyfrwerthwyr,’ ychwanegodd, ‘mae’n braf cael adrodd bod gwerthiant llyfrau Cymraeg a llyfrau Saesneg o ddiddordeb Cymreig yn dal i gynyddu, a bod y gwerthiant drwy’r Ganolfan Ddosbarthu wedi dyblu dros y deng mlynedd diwethaf.’

Am fwy o wybodaeth cysyllter ag:

Elwyn Jones, Swyddog Marchnata,
Cyngor Llyfrau Cymru, Castell Brychan,
Aberystwyth, Ceredigion, SY23 2JB
(01970) 624151 2 (01970) 625385
elwyn.jones@cllc.org.uk