CYFOETH
LLYFRAU CYMRU
Mae’r llyfryn Good Reading From Wales, a gyhoeddwyd gan
y Cyngor Llyfrau yn ddiweddar, yn gyflwyniad gwych i’r
cyfoeth o lenyddiaeth Saesneg o ddiddordeb Cymreig sydd ar gael.
Mae’r casgliad eang o deitlau yn cynnwys nofelau, barddoniaeth
a dramâu, gan gynnig rhywbeth at ddant pob darllenydd.
Gyda diddordeb cynyddol ym mhopeth Cymreig, fe fydd y llyfryn
Good Reading From Wales yn sicr o gael ei groesawu.
‘Y bwriad oedd cynnwys manylion am y goreuon yn y maes,’
meddai Elwyn Williams, Swyddog Datblygu Cynllun Ymestyn y Cyngor
Llyfrau, ‘a thrwy hynny gyflwyno’r cyfoeth, yr amrywiaeth
a’r safon uchel o ysgrifennu creadigol a geir yng Nghymru
heddiw.’
‘Rydym hefyd yn ddiolchgar iawn i’r cyhoeddwyr am
eu cydweithrediad a’u cefnogaeth wrth baratoi’r llyfryn,’
ychwanegodd Mr Williams, ‘a hyderwn yn fawr y bydd
y sylw ychwanegol yma i’r llyfrau yn arwain at werthiant
ychwanegol drwy siopau.’
Mae’r llyfryn Good Reading From Wales eisoes wedi ei ddosbarthu’n
helaeth, ond mae croeso i unrhyw un sydd eisiau copi yn rhad
ac am ddim gysylltu ag Elwyn Williams yn y Cyngor Llyfrau.
Good Reading From Wales yw’r diweddaraf mewn cyfres o gyhoeddiadau’r
Cynllun Ymestyn ac mae’n ategu prif waith y Cynllun, sef
hyrwyddo gwerthiant llyfrau mewn digwyddiadau amrywiol yng Nghymru
a thu hwnt. Fe gefnogir y Cynllun gan Gyngor Celfyddydau
Cymru.
Am wybodaeth bellach cysyllter ag: Elwyn Jones, Pennaeth Gweinyddiaeth
a Chysylltiadau Cyhoeddus, Cyngor Llyfrau Cymru, Castell Brychan,
Aberystwyth, Ceredigion SY23 2JB ( (01970) 624151
2 (01970) 625385 : elwyn.jones@cllc.org.uk
|
