5
Rhagfyr, 2003
LLWYDDIANT YSGUBOL Y CYNLLUN YMESTYN
Cyhoeddodd y Cyngor Llyfrau heddiw (5 Rhagfyr 2003) bod y Cynllun
Ymestyn wedi cyrraedd carreg filltir nodedig yn ei hanes, gan
sicrhau gwerthiant gwerth £1m ers ei sefydlu ym mis Medi
1995.
Sefydlwyd y Cynllun Ymestyn gyda’r bwriad o annog llyfrwerthwyr
ledled Cymru i hybu gwerthiant llyfrau Cymraeg a llyfrau Saesneg
o ddiddordeb Cymreig drwy gynnal stondinau llyfrau mewn amrywiol
ddigwyddiadau a gweithgareddau. Mae 163 o siopau wedi
defnyddio’r Cynllun ers ei sefydlu, gan fynychu 2,840 o
ddigwyddiadau.
Gwnaed y cyhoeddiad arbennig hwn gan Gwerfyl Pierce Jones, Cyfarwyddwr
y Cyngor Llyfrau, yn ystod Cyfarfod Blynyddol y Cyngor a gynhaliwyd
eleni yn Wrecsam.
‘Y mae’r Cynllun Ymestyn wedi bod yn llwyddiant diamheuol,’
meddai Gwerfyl Pierce Jones, ‘gan ddangos pa mor bwysig
yw sicrhau bod pobl drwy Gymru gyfan yn cael cyfle i weld ac
i brynu’r cyfoeth o lyfrau sydd ar gael. Y mae hefyd
yn glod i’r llyfrwerthwyr sydd wedi bod yn rhan o’r
cynllun ac i’r Swyddogion brwd sydd wedi bod yn ei arwain.’
Fe gyfeiriodd Gwerfyl Pierce Jones hefyd at yr Adolygiad Polisi
ar Ysgrifennu Cyfrwng Saesneg yng Nghymru a gynhelir ar hyn
o bryd gan Bwyllgor Diwylliant y Cynulliad Cenedlaethol, gan
groesawu’r cyfle i drafod y maes pwysig hwn er mwyn sicrhau
diwydiant cyhoeddi bywiog a ffyniannus yng Nghymru yn y ddwy
iaith.
‘Rydym yn hynod falch fod y Pwyllgor Diwylliant yn rhoi
sylw i’r maes hwn,’ ychwanegodd Gwerfyl Pierce Jones.
‘Y mae’n dilyn yr adolygiad a fu ar gyhoeddi yn y
Gymraeg yn ddiweddar, ac eisoes fe welir canlyniadau cadarnhaol
yr adolygiad hwnnw. Hyderwn yn fawr y bydd yr adolygiad
ar gyhoeddi yn yr iaith Saesneg yn arwain at ddatblygiadau tebyg.’
Yn ystod ei haraith yn y Cyfarfod Blynyddol, fe gyfeiriodd Gwerfyl
Pierce Jones hefyd at rai o’r datblygiadau cyffrous eraill
yn y diwydiant cyhoeddi yng Nghymru ar hyn o bryd, gan gynnwys
paratoi Strategaeth Farchnata Gytûn gan holl sectorau’r
diwydiant, datblygiadau arwyddocaol i wefan lyfrau gwales.com
a chynlluniau llwyddiannus i hybu llyfrau o Gymru dramor.
Gorffennodd drwy ddiolch i bawb o fewn y diwydiant cyhoeddi
yng Nghymru ac i staff y Cyngor Llyfrau am eu hymdrech a’u
sêl dros hybu llyfrau o Gymru.
Am unrhyw wybodaeth bellach cysyllter ag: Elwyn Jones,
Pennaeth Gweinyddiaeth a Chysylltiadau Cyhoeddus, Cyngor Llyfrau
Cymru, Castell Brychan, ABERYSTWYTH, Ceredigion SY23 2JB
Ffôn (01970) 624151 Ffacs (01970) 625385 :
elwyn.jones@cllc.org.uk |
