ENNILL GWYLIAU (10 Mawrth 2003)
 
Bydd dyn o Langadog yn cael y cyfle i fwynhau gwyliau ymlaciol yn y dyfodol agos, yn dilyn ennill cystadleuaeth arbennig yn atodiad llyfrau’r Cyngor Llyfrau.
 
Rhobert ap Steffan o Langadog, Sir Gaerfyrddin, oedd enillydd lwcus y gystadleuaeth a ymddangosodd yn yr atodiad llyfrau Gwledd y Nadolig, a ddosbarthwyd yn eang drwy rwydwaith y papurau bro.
 
Gosodwyd pedwar o gwestiynau ar gyfer y gystadleuaeth, ac roedd atebion Rhobert ap Steffan ymysg y cannoedd o atebion cywir a dderbyniwyd gan y Cyngor Llyfrau yn Aberystwyth.
 
Noddwyd y gystadleuaeth gan gwmni teithio Seren Arian, Caernarfon, ac fe fydd Rhobert yn derbyn tocyn gwyliau yn rhodd gan y cwmni.
 
‘Mae’r atodiadau llyfrau rydym yn eu cynhyrchu yn hynod o boblogaidd gyda’r darllenwyr,’ meddai Phil Davies, Pennaeth Marchnata’r Cyngor Llyfrau.  ‘Cawsom ymateb arbennig o dda i’r gystadleuaeth hon eleni, ac rydym yn ddiolchgar iawn i gwmni Seren Arian am eu nawdd unwaith eto.’
 
Am fwy o wybodaeth cysyllter ag: Elwyn Jones,
Swyddog Gweinyddiaeth a Chysylltiadau Cyhoeddus,
Cyngor Llyfrau Cymru, Castell Brychan, ABERYSTWYTH, Ceredigion, SY23 2JB
T (01970) 624151
F (01970) 625385
E elwyn.jones@cllc.org.uk