CHWILIWCH A CHWI A GEWCH!
 
DEFNYDDIO’R WE I CHWILIO AM LYFRAU O GYMRU
 
Mae’r datblygiadau diweddaraf ar wefan y Cyngor Llyfrau – www.gwales.com – yn ei gwneud hi’n haws i’r cyhoedd chwilio a chael gwybodaeth am lyfrau o Gymru yn y ddwy iaith.
 
‘Roedd yr hen safle’n wych os oedd y darllenydd yn gwybod am beth roedd yn chwilio,’ meddai Gwerfyl Pierce Jones, Cyfarwyddwr y Cyngor Llyfrau, ‘ond mae’r datblygiad diweddaraf yn un sylweddol a’r bwriad yw helpu darllenwyr i ddod o hyd i’r llyfrau perthnasol ar eu cyfer.  Gallwn ymfalchïo yn y llyfrau a gyhoeddir yma yng Nghymru ac mae’n bwysig ein bod yn defnyddio’r dechnoleg ddiweddaraf i hwyluso a symleiddio’r broses o ddod o hyd iddynt.’
 
Fe welir y prif newidiadau ar dudalen flaen y wefan lle ceir detholiad arbennig o lyfrau newydd a rhestrau o lyfrau dan y pennawd Gwerth eu Darllen wedi eu trefnu yn ôl categorïau ar gyfer plant ac oedolion.  Ceir hefyd sylw i’r adolygiadau diweddaraf, a chynigion arbennig, gyda’r darllenydd ei hun yn cael dewis a yw eisiau gwybodaeth am lyfrau plant neu oedolion, yn Gymraeg neu yn Saesneg.
 
Ar y dudalen flaen hefyd y mae yna flwch chwilio cyflym i’r darllenydd gael hyd i lyfr mewn modd syml a hwylus, a thrwy nodi enw awdur neu deitl bydd manylion yn ymddangos ymhen eiliadau’n unig.  Fel o’r blaen, mae’n bosib archebu unrhyw lyfr drwy’r wefan neu o siop lyfrau o ddewis y darllenydd.
 
‘Nod pob gwefan yw ei gwneud yn syml i’r cyhoedd ddod o hyd i wybodaeth,’ meddai Phil Davies, Pennaeth Adran Farchnata’r Cyngor Llyfrau.  ‘Dyma pam bod cryn feddwl wedi ei roi i ail-gynllunio’r wefan, ac rydym yn credu bod y datblygiadau hyn yn gam mawr ymlaen.  Byddem yn eich annog i gyd i gael golwg ar y wefan ar ei newydd wedd.’
 
Datblygwyd y wefan gan gwmni Ateb Cyf., gyda chefnogaeth Llywodraeth Cynulliad Cymru.
 
Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion  SY23 2JB ( (01970) 624151  2 (01970) 625385  : elwyn.jones@cllc.org.uk