18 Ionawr , 2002

CYNNYDD YNG NGWERTHIANT LLYFRAU’R NADOLIG
 
Bu’r wythnosau cyn y Nadolig yn gyfnod prysur iawn yn y siopau llyfrau ledled Cymru, gyda chynnydd sylweddol yng ngwerthiant llyfrau drwy Ganolfan Ddosbarthu’r Cyngor Llyfrau.
 
Roedd ffigurau gwerthiant y Ganolfan ar gyfer mis Rhagfyr 2001 yn dangos cynnydd o 25% ar werthiant mis Rhagfyr 2000, gyda gwerthiant Tachwedd a Rhagfyr gyda’i gilydd yn dangos cynnydd o dros 12% ar y flwyddyn flaenorol.
 
‘Rydym wedi gweld cynnydd cyson yn ffigurau gwerthiant llyfrau’r Nadolig,’ meddai Phil Davies, Pennaeth Adran Farchnata’r Cyngor Llyfrau, ‘ond roedd y cynnydd eleni yn arbennig iawn, ac yn golygu mai dyma’r Tachwedd/Rhagfyr gorau erioed yn hanes y Ganolfan Ddosbarthu.
 
‘Roeddem yn ymwybodol bod yna nifer o lyfrau poblogaidd iawn wedi ymddangos ac y byddent yn sicr o werthu dda. Mae’n amlwg bod yr holl ddarllenwyr wedi gwerthfawrogi’r dewis oedd yn cael ei gynnig gan y cyhoeddwyr. Bu’r flwyddyn ddiwethaf yn un anodd i nifer o gyhoeddwyr a llyfrwerthwyr wrth i argyfwng clwy’r traed-a’r-genau arwain at ostyngiad yng ngwerthiant llyfrau dros y gwanwyn a’r haf. Fe fydd y cynnydd hwn yng ngwerthiant llyfrau’r Nadolig, felly, yn cael ei groesawu gan y diwydiant llyfrau yma yng Nghymru.’
 
 
Am fwy o wybodaeth cysyllter ag: Elwyn Jones, Swyddog Marchnata, Cyngor Llyfrau Cymru, Castell Brychan, Aberystwyth, Ceredigion, SY23 2JB
(01970) 624151
(01970) 625385
Ebost: elwyn.jones@cllc.org.uk