6
Chwefror 2002
RHOI SYLW I WLEIDYDDIAETH
CYMRU
Er bod llai o bobl yn pleidleisio mewn etholiadau y dyddiau
hyn, mae mwy o lyfrau nag erioed yn cael eu cyhoeddi am y pwnc.
Mae’n briodol, felly, bod y daflen wybodaeth ddiweddaraf
i’w pharatoi gan y Cyngor Llyfrau yn rhoi sylw i lyfrau
ym maes Gwleidyddiaeth a Materion Cyfoes. Mae’r daflen
ddwyieithog atyniadol yn cynnwys 48 o deitlau amrywiol yn Gymraeg
ac yn Saesneg.
Mae ystod eang o lyfrau yn cael eu cynrychioli, o astudiaethau
arbenigol i gofiannau a hunangofiannau, ac o lyfrau ffeithiol
i gyfrolau pryfoclyd ar sawl agwedd o wleidyddiaeth.
‘Mae rhychwant y detholiad yn dyst i’r cynnydd sydd
wedi bod yn y maes yma yn ystod y blynyddoedd diweddar,’
meddai Elwyn Williams, Swyddog Cynllun Ymestyn y Cyngor Llyfrau.
‘Nid teitlau academaidd i’w hastudio’n unig a
geir ond, yn hytrach, toreth o waith cyfoes a darllenadwy ar
gyfer yr arbenigwyr a’r lleygwyr fel ei gilydd.’
Cyhoeddwyd y daflen dan adain Cynllun Ymestyn y Cyngor, ac ers
sefydlu’r cynllun hwnnw yn 1995, fe gyhoeddwyd cyfres o
daflenni’n hyrwyddo cyhoeddiadau mewn meysydd penodol.
Mae’r taflenni’n ategu prif waith y Cynllun, sef hyrwyddo
gwerthiant llyfrau mewn digwyddiadau o bob math yng Nghymru
a thu hwnt, ac fe’i cefnogir gan Gyngor Celfyddydau Cymru.
‘Rydym yn ddiolchgar i’r cyhoeddwyr am eu cefnogaeth
wrth baratoi’r daflen,’ ychwanegodd Elwyn Williams,
‘ac rydym yn gobeithio’n fawr y bydd yn fodd i roi
sylw ychwanegol i’r llyfrau ac i hybu’r gwerthiant.’
Mae’r daflen ar gael drwy’r siopau llyfrau ledled
Cymru neu drwy gysylltu ag Elwyn Williams yn Adran Farchnata’r
Cyngor Llyfrau ar Aberystwyth (01970) 624151 neu e-bost elwyn.jones@cllc.org.uk
|
