CYFLWYNO GWOBRAU LLYFRAU PLANT
 
Cyflwynwyd Gwobrau Tir Na n-Og ar 18 Hydref gan Alun Pugh, y Gweinidog dros Ddiwylliant, y Gymraeg a Chwaraeon, mewn seremoni arbennig yng Nghaerdydd.
 
Fe gyflwynir y Gwobrau, o £1,000 yr un, yn flynyddol gan Gyngor Llyfrau Cymru a CILIP Cymru i anrhydeddu gwaith awduron a dylunwyr llyfrau plant. Yr enillwyr eleni yw:

GWOBR FFUGLEN ORAU’R FLWYDDYN Eco, Emily Huws (Cymdeithas Lyfrau Ceredigion) Aberystwyth   Nofel ar gyfer plant 9-12 oed yw hon, yn portreadu’r tensiynau ym mywyd cythryblus Blodyn Haf a’i mam sy’n eco-ryfelwraig.  Dyma’r trydydd tro i Emily Huws ennill Gwobr Tir na n-Og.
GWOBR AM LYFR GORAU’R FLWYDDYN AC EITHRIO FFUGLEN Byd Llawn Hud (Gomer) Llandysul   Cyfrol o ugain o gerddi newydd am helyntion plant â byd natur, ffrindiau a theulu gan feirdd cyfoes yn cynnwys Mererid Hopwood (Bardd Plant Cymru 2005/06), Tudur Dylan a Ceri Wyn Jones.  Mae’r gyfrol wedi ei dylunio’n hardd gan Chris Glynn.
GWOBR LLYFR SAESNEG GORAU’R FLWYDDYN The Seal Children, Jackie Morris (Francis Lincoln) Llundain   Stori hudolus wedi ei darlunio’n chwaethus i ddarllenwyr 7-9 oed yn adrodd chwedl werin am hanes hanner-merch a hanner-morlo sy’n dwyn gwaredigaeth i drigolion pentref unig.  Dyma’r ail dro i Jackie Morris ennill Gwobr Tir na n-Og.

Dywedodd Alun Pugh, y Gweinidog Diwylliant, ‘Mae llyfrau deniadol o safon yn hanfodol i hybu plant a phobl ifainc i fwynhau darllen.  Rwy’n hynod falch o gael bod yma heno i anrhydeddu’r enillwyr ym maes llyfrau plant yng Nghymru.’
 
Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion  SY23 2JB T (01970) 624151  F (01970) 625385  E elwyn.jones@cllc.org.uk