31
Gorffennaf, 2002
GWLEDD O LYFRAU YN NHYDDEWI
Fel rhan o raglen weithgareddau’r Cyngor Llyfrau ar faes
Eisteddfod Genedlaethol Tyddewi eleni, fe fydd Bardd Plant Cymru,
Menna Elfyn, yn cael ei hanrhydeddu mewn cyfarfod arbennig yn
y Babell Lên am 2 o’r gloch ddydd Mercher, 7 Awst.
Cyhoeddwyd mai Menna Elfyn fyddai’n derbyn teitl Bardd
Plant Cymru ar lwyfan Eisteddfod yr Urdd, Caerdydd, eleni a
bydd cyfle yn Nhyddewi i’w chlywed yn cael ei holi gan
Catrin Beard am ei bywyd a’i gwaith.
Fe sefydlwyd teitl Bardd Plant Cymru dair blynedd yn ôl,
a Menna yw’r ferch gyntaf i dderbyn yr anrhydedd gan ddilyn
Myrddin ap Dafydd a Meirion McIntyre Huws (Mei Mac).
Yn ystod wythnos yr Eisteddfod Genedlaethol bydd hefyd nifer
o lansiadau llyfrau newydd yn cael eu cynnal yn Neuadd Arddangos
y Cyngor Llyfrau gyda’r awduron yno’n bresennol i
sôn am eu gwaith ac i lofnodi copïau.
‘Rydym yn hyderus y bydd hi’n Eisteddfod lwyddiannus,’
meddai Phil Davies, Pennaeth Marchnata’r Cyngor Llyfrau.
‘Mae’r cyhoeddwyr wedi bod yn hynod o brysur yn paratoi
gwledd o lyfrau ar gyfer y darllenwyr, a gallwn eich sicrhau
bod yna lyfrau at ddant pawb.’
Eisoes mae’r Cyngor Llyfrau wedi dosbarthu 50,000 copi
o’r atodiad lliwgar Llyfrau’r Haf, a bydd y cyfan
o’r llyfrau ar werth yn y Neuadd Arddangos ac yn y stondinau
llyfrau ar hyd a lled y maes.
Bydd y cyfrolau canlynol yn cael sylw arbennig yn Neuadd Arddangos
y Cyngor Llyfrau yn ystod yr wythnos:
Dydd Mawrth, 6 Awst
11.30 Bro a Bywyd: Rhydwen Williams, Emyr Edwards (Barddas)
Dydd Mercher, 7 Awst
12.00 Cerddi Fan Hyn: Sir Benfro, Arwel Jones a Mererid Hopwood
(Gomer)
Dydd Iau, 8 Awst
12.30 Chwarae Mig, Annes Glyn (Gomer)
2.30 The Glyn Dwr Legacy, Bill Bailey
(United Writers Publications)
Dydd Gwener, 9 Awst
11.00 Ddoe yn Ôl, Menna Cravos (Y Lolfa)
12.30 Cwmtec, Gareth Miles (Carreg Gwalch)
Am fwy o wybodaeth cysyllter ag:
Elwyn Jones, Pennaeth Gweinyddiaeth a Chysylltiadau Cyhoeddus,
Cyngor Llyfrau Cymru, Castell Brychan, ABERYSTWYTH, Ceredigion,
SY23 2JB
Ffôn (01970) 624151 Ffacs (01970) 625385 :
elwyn.jones@cllc.org.uk |
