24 Hydref 2001

MEI MAC YN YSBRYDOLI'R IFANC

Ysgol Talybont, Ceredigion, gyda Mei Mac yng Nghorris

Mae darpar-feirdd o dair ysgol gynradd yng Nghymru wedi cymryd rhan mewn cyfres o weithdai arbennig a gynhaliwyd gan Fardd Plant Cymru, Meirion MacIntyre Huws, sy'n cael ei adnabod gan bawb fel Mei Mac, wrth gwrs.

Yr ysgolion hyn a ddaeth i'r brig mewn cystadleuaeth a drefnwyd gan S4C a Chyngor Llyfrau Cymru i annog y gwerthiant o lyfrau Cymraeg trwy Sbondonics, y clwb llyfrau i blant. Eu gwobr oedd cael y cyfle i ymuno ag un o weithdai Mei Mac.

Yr ysgolion a ddaeth i'r brig oedd Ysgol Gymraeg Rhydaman, Ysgol Gymunedol Tal-y-bont, Ceredigion, ac Ysgol Gynradd yr Eifl, Trefor, Pwllheli.

Yn hytrach na chynnal y gweithdai yn yr ysgolion penderfynodd Mei Mac y byddai'n cynnig ysbrydoliaeth i�r beirdd ifainc trwy eu tywys i leoliadau cyffrous.

Cynhaliwyd y gweithdy ar gyfer disgyblion Ysgol Gymraeg Rhydaman yn y Gerddi Botaneg Cenedlaethol yn Llanarthne, Sir Gaerfyrddin. Bu'r beirdd ifanc o Ysgol Gymunedol Tal-y-Bont yn ymweld â Labrinth y Brenin Arthur yng Nghorris, tra cynhaliwyd y gweithdy ar gyfer disgyblion Ysgol Gynradd yr Eifl ym Mhwerdy Dinorwig a'r Ganolfan Ymwelwyr yno.

'Roedd pawb wedi mwynhau eu hunain yn arw, meddai Mei Mac. 'Roedd yn gyffrous gweld y plant yn ymateb i'w hamgylchedd, ac yn meddwl am ffurf newydd o gyfathrebu.'

Bydd gwaith rhai o'r disgyblion yn cael ei gynnwys yng nghyfrol Bardd Plant Cymru 2001, Rhedeg Ras Dan Awyr Las, a gaiff ei chyhoeddi'n ddiweddarach eleni.

Mei Mac yn Ysgol Gymraeg Rhydaman

Ysgol yr Eifl, gyda Mei Mac a Lowri Morgan, Uned 5