27 Tachwedd 2003

LLYFRAU’R NADOLIG
 
Jôcs y Noson Lawen, Ryseitiau Dudley, nofelau gan Sonia Edwards ac Eigra Lewis Roberts, Caneuon John ac Alun a hunangofiannau Gwenda Owen, Meic Stephens a’r darlledwr praff a phigog hwnnw, Gwilym Owen.  Dyma rai o’r llyfrau sy’n cael eu cyhoeddi’n arbennig ar gyfer y Nadolig eleni, ac sy’n  cael eu hysbysebu yn atodiad diweddaraf y Cyngor Llyfrau, sef Gwledd y Nadolig.
 
Yn ogystal â’r atodiad o lyfrau Cymraeg, y mae’r Cyngor Llyfrau hefyd wedi cyhoeddi atodiad o lyfrau Saesneg, Books from Wales, sy’n llawn o’r teitlau diweddaraf ar gyfer yr W?yl.
 
‘Mae dewis arbennig o dda o lyfrau ar gyfer y Nadolig hwn,’ meddai Phil Davies, Pennaeth Adran Farchnata’r Cyngor Llyfrau, ‘a gyda theitlau ar gyfer y plant lleiaf, pobl ifanc ac oedolion, y mae yna ddigon o ddewis i bawb. Cynhwysir manylion am dros 200 o lyfrau rhwng y ddau atodiad ac mi fydd y cyfan ar gael yn eich siop lyfrau leol.’
 
Cynhyrchwyd 80,000 copi o’r atodiad Gwledd y Nadolig ac y maent eisoes wedi eu dosbarthu trwy rwydwaith y 52 o bapurau bro a gyhoeddir drwy Gymru benbaladr.  Yn ôl yr arfer, fe geir cystadleuaeth arbennig ar y dudalen gefn gyda thocyn gwyliau gwerth £250 yn rhodd gan gwmni teithio Seren Arian, Caernarfon.  Fe ddosberthir yr atodiad Books from Wales gyda rhifyn o’r Western Mail, gyda chopïau hefyd yn cael eu dosbarthu i’r siopau llyfrau ac i’r llyfrgelloedd.  Eleni fe argraffwyd 70,000 copi o’r atodiad hwn.
 
‘Unwaith eto, mae’r cyhoeddwyr wedi bod yn brysur iawn,’ ychwanegodd Phil Davies, ‘ac mi fydd yr holl lyfrau’n sicr o’ch cadw’n ddiddig dros gyfnod y Nadolig.’
 
Am fanylion pellach cysyllter ag:  Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, Aberystwyth, Ceredigion SY23 2JB
T (01970) 624151  F (01970) 625385  elwyn.jones@cllc.org.uk