Beth am rannu'r pleser a gewch wrth ddarllen yr haf yma? Dyna nod WYTHNOS LLYFR YN ANRHEG y Flwyddyn Darllen Genedlaethol.

Rhwng 7 a 12 Gorffennaf bydd pobl ym mhob cwr o Gymru'n rhoi llyfrau'n anrhegion i'w teulu, eu ffrindiau a'u cydweithwyr, a hynny'n rhan o WYTHNOS LLYFR YN ANRHEG - y digwyddiad cenedlaethol cyntaf o'i fath yng Nghymru.

Cewch ymuno a hwyl yr wythnos fel y mynnwch - beth am brynu llyfr newydd i'r plant, rhannu eich hoff nofel gyda'ch ffrind gorau, neu roi ambell deitl i gydweithwyr? Wedi'r cyfan, gwell rhoi na derbyn!

Cewch ragor o wybodaeth ar www.yearofreadingwales.org.uk/giveabookweek neu yn eich siop lyfrau leol.

Enillwyr Gwobrau Cymraeg Tir na n-Og 2008

Bydd dewis gwych o lyfrau ar werth yn Eisteddfod yr Urdd Sir Conwy.

Cyhoeddodd y Cyngor Llyfrau enwau enillwyr Gwobrau Cymraeg Tir na n-Og 2008 mewn seremoni arbennig ar lwyfan Eisteddfod Genedlaethol yr Urdd Sir Conwy.

Enillydd y wobr yn y categori cynradd oedd Nicholas Daniels am ei nofel Y Llyfr Ryseitiau: Gwaed y Tylwyth (Dref Wen). Enillydd y wobr yn y categori uwchradd oedd Gareth F. Williams am ei nofel Eira Mân, Eira Mawr (Gomer).

Manylion pellach.

Dewis da o Lyfrau

Bydd dewis gwych o lyfrau ar werth yn Eisteddfod yr Urdd Sir Conwy.

Fe fydd siop lyfrau Bys a Bawd, Llanrwst, yn rhannu stondin gyda'r Cyngor Llyfrau ar faes Eisteddfod yr Urdd eleni, gan gynnig detholiad gwych o lyfrau i'r cyhoedd. Mae Bys a Bawd hefyd wedi paratoi rhaglen lawn o weithgareddau drwy'r wythnos ac felly cofiwch alw i'n gweld ar y maes.

Gwobr Saesneg Tir na n-Og 2008

Cyhoeddodd Cyngor Llyfrau Cymru enw enillydd gwobr Saesneg Tir na n-Og am 2008, gwobr sy'n cydnabod safon arbennig llyfrau gyda chefndir Cymreig dilys iddynt i blant a phobl ifanc.

Enillydd y wobr Saesneg yw Frances Thomas am ei nofel i bobl ifanc Finding Minerva, Gomer/Pont Books. Noddir y wobr gan CILIP Cymru (Sefydliad Siartredig Llyfrgellwyr a Gweithwyr Gwybodaeth Cymru) ac fe'i cyflwynwyd i'r awdur yn ystod derbyniad yng nghynhadledd CILIP yn Llandrindod, Powys.

Gŵyl Bedwen Lyfrau 2008

Cynhelir Gŵyl Bedwen Lyfrau yng Nghrymych eleni nos Wener a dydd Sadwrn, 3/4 Mai, ac unwaith eto mae Cwlwm Cyhoeddwyr Cymru wedi paratoi gwledd o ddigwyddiadau ar gyfer y cyhoedd. Dyma rai o’r awduron fydd yn ymwela â’r ŵyl: Mererid Hopwood, Lyn Ebenezer, Jenny Ogwen ac Aneurin Jones.

Cliciwch yma am fwy o wybodaeth.

Cymorth i'r Wasg Gymraeg

Gwahoddir ceisiadau am gymorth ariannol tuag at gefnogi mentrau newydd, blaengar (print ac ar-lein) ym maes papurau newydd a chylchgronau materion cyfoes Cymraeg.

Ceir manylion pellach trwy gysylltu â'r Cyfarwyddwr, Cyngor Llyfrau Cymru, Castell Brychan, Aberystwyth, Ceredigion, SY23 2JB Ffôn 01970 624151 e-bost castellbrychan@cllc.org.uk

Dyddiad cau ar gyfer ceisiadau: Dydd Mercher, 30 Ebrill 2008.

Arwerthiant Llyfrau Hanner Pris

Mae cannoedd o deitlau ar werth am hanner pris neu lai yn Arwerthiant Llyfrau Hanner Pris y Cyngor Llyfrau. Cliciwch Cynigion Arbennig ar dudalen Hafan Gwales i weld y rhestr gyflawn.

Arian Newydd I'r Wasg Brintiedig Cyfrwng Cymraeg

Cafwyd yr ymateb canlynol gan Gyfarwyddwr y Cyngor Llyfrau, Gwerfyl Pierce Jones: Mae'r Cyngor Llyfrau'n croesawu penderfyniad y Gweinidog i glustnodi £200,000 yn flynyddol dros y tair blynedd nesaf i ddatblygu a chryfhau'r wasg brintiedig Gymraeg.

Mae'n gynnydd sylweddol ar y cyllid sydd ar gael ar hyn o bryd ac fel y dangosodd arolwg Tony Bianchi roedd taer angen adnoddau ychwanegol i ddatblygu'r maes. Mae'r arolwg yn cyfeirio'n benodol at safon uchel rhai o'r cyhoeddiadau cyfredol.

Tasg y Cyngor Llyfrau yn awr yw sicrhau bod yr arian yn cael ei ddefnyddio yn y ffordd fwyaf effeithiol posibl er mwyn datblygu a chryfhau'r maes. Fe fydd Panel Grantiau'r Cyngor yn cyfarfod ym mis Mawrth, ac yn dilyn hynny fe gyhoeddir manylion llawn ynglŷn â sut i wneud cais.

Cyfres Library of Wales

Wrth ymweld ag Ysgol Uwchradd Aberteifi, fe gyflwynodd Rhodri Glyn Thomas, y Gweinidog dros Dreftadaeth, set gyflawn o'r gyfres Library of Wales i ddisgyblion y chweched dosbarth.

Mae'r Library of Wales yn gynllun cyffrous fydd yn dod â nifer o glasuron Saesneg o Gymru yn ôl i brint. Cyhoeddir y gyfres gan gwmni Parthian o Aberteifi gyda chefnogaeth Llywodraeth Cynulliad Cymru a Chyngor Llyfrau Cymru.

Llun: Rhodri Glyn Thomas, y Gweinidog dros Dreftadaeth yn cyflwyno set o gyfrolau Library of Wales i Daniel Jay a Catrin Powell o Ysgol Uwchradd Aberteifi.