DIWRNOD Y LLYFR: 4 MAWRTH 2004

Mae’r gwaith o drefnu dathliadau Diwrnod y Llyfr yng Nghymru eisoes ar y gweill. Mae pecyn gwybodaeth cynhwysfawr i ysgolion wedi ei baratoi a bydd yn cael ei ddosbarthu i’r ysgolion yn fuan.

Unwaith eto y mae’r pecyn yn llawn deunyddiau difyr ar gyfer y dathliadau, gan gynnwys posteri lliwgar a thaflen syniadau.  Ceir mwy o wybodaeth hefyd ar wefan Diwrnod y Llyfr 2004 drwy glicio YMA.

‘Rydym wedi gwneud ymdrech arbennig eleni i greu pecyn difyr i’r ysgolion,’ meddai Delyth Humphreys, cydlynydd gweithgareddau Diwrnod y Llyfr ar ran y Cyngor Llyfrau, ‘ac rydym yn sicr y bydd miloedd o ddisgyblion yn cael pleser a mwynhad o’r digwyddiad.’

BLAS AR GYMRU YM MHARIS A DULYN

Mae’r Cyngor Llyfrau wrthi’n trefnu ymgyrch arbennig yn siopau W.H. Smith, Paris, ac Easons, Dulyn, i ddathlu Dydd Gw�yl Ddewi.  Fe fydd yr ymgyrch ‘Blas ar Gymru’ yn hyrwyddo detholiad o lyfrau gan gynnwys teitlau taith, coginio, llenyddiaeth a hanes.  Bydd yr ymgyrch yn cael ei chynnal am bythefnos, o 25 Chwefror hyd at 10 Mawrth.
 
‘Dyma gyfle gwych i chwifio baner Cymru,’ meddai Bridget Shine, Swyddog Marchnata Tramor y Cyngor Llyfrau, ‘ac i hyrwyddo llyfrau ardderchog o Gymru.’

ELUSENNAU CYMRU’N CEFNOGI DIWRNOD Y LLYFR
 
Fel rhan o ddathliadau Diwrnod y Llyfr a gynhelir ddydd Iau 4 Mawrth, mae aelodau o Sefydliad y Merched yng Nghymru yn brysur yn casglu llyfrau i’w cyflwyno i siopau nifer o elusennau yng Nghymru.  Fel rhan o’r ymgyrch fe fydd y siopau elusen yn arddangos posteri Diwrnod y Llyfr yn eu ffenestri.
 
Y llynedd, bu Barnardo, y Groes Goch, Tenovus, Ty� Gobaith yng Nghymru, Oxfam, Ty� Hafan, Byddin yr Iachawdwriaeth ac Ymchwil Cancr Cymru yn rhan o’r dathlu, ac eleni mae’r R.S.P.C.A. a Sefydliad Prydeinig y Galon hefyd wedi ymuno â hwy.
 
‘Rydym yn ddiolchgar iawn i’r holl elusennau am eu cefnogaeth,’ meddai Delyth Humphreys, cydlynydd gweithgareddau Diwrnod y Llyfr ar ran y Cyngor Llyfrau, ‘ac yn eu llongyfarch am fanteisio ar y diwrnod i godi arian at achosion teilwng.’

RHESTR FER GWOBRAU TIR NA N-OG 2004
 
Y teitlau isod sydd ar y rhestr fer eleni:
 
Ffuglen Orau’r Flwyddyn
 
Y ‘Fo’ yn y Tŷ,
Mair Wynn Hughes (Gwasg y Bwthyn)

Iawn Boi?;-),
Caryl Lewis (Y Lolfa)

Mewn Limbo,
Gwyneth Glyn (Y Lolfa)
 
Llyfr gorau’r Flwyddyn ac Eithrio Ffuglen
 
Ffeithiau Ffwtbol,
Gary Pritchard (Dref Wen)

Mae Modfedd yn Llawer Mewn Trwyn,
gol. Myrddin ap Dafydd (Carreg Gwalch)

Stori Dafydd ap Gwilym,
Gwyn Thomas a Margaret Jones (Y Lolfa)
 
Llyfr Saesneg Gorau’r Flwyddyn
 
A Wind From the Sea,
Jennifer Morgan (Pont Books/Gomer)

The Battle of Mametz Wood, 1916,
Robert Phillips (CAA)

Now That I’ve Found You,
Rex Harley (Pont Books/Gomer)

Weird Tales from the Storyteller,
Daniel Morden (Pont Books/Gomer)
 
Bydd enwau’r enillwyr yn cael eu cyhoeddi mewn rhaglen deledu ar Ddiwrnod y Llyfr, dydd Iau, 4 Mawrth.

DATHLU DIWRNOD Y LLYFR
 
Bydd gweithgareddau Diwrnod y Llyfr yn cael eu lansio mewn steil ym mhencadlys y Cyngor Llyfrau gyda brecwast arbennig yn gynnar fore Iau, 4 Mawrth.  Bydd y brecwast Cymreig yn sail dda i ddiwrnod prysur o weithgareddau a gynhelir drwy Gymru.
 
Bydd nifer o awduron, gan gynnwys Anwen Francis, Mair Wynn Hughes a Brenda Wyn Jones, yn rhan o daith arbennig yn ymweld â siopau llyfrau; bydd gweithgareddau llyfrau’n cael eu cynnal mewn coedwigoedd drwy Gymru dan faner Menter Coedwigaeth; bydd y nofel Snogs a Sgribls Hogan Flêr, Gwen Lasarus, a’r gyfrol o farddoniaeth, Hen Wragedd a Ffyn ac Eira Gwyn, (gol. Myrddin ap Dafydd) yn cael eu lansio ar y dydd, ac yn Llyfrgell Rhuthun mae noson ‘Blas Mwg’ yn addo cyfle i flasu gwin, siocled a llyfrau!
 
Ar Ddiwrnod y Llyfr hefyd fe gyhoeddir enwau enillwyr Gwobrau Tir na n-Og 2004 a’r rhestr fer o lyfrau ar gyfer Gwobr Llyfr y Flwyddyn. 
 
‘Mae’n amlwg y bydd hwn yn ddiwrnod i’w gofio yng Nghymru,’ meddai Delyth Humphreys ar ran y Cyngor Llyfrau.  ‘Gobeithiwn yn fawr y bydd pobl o bob oed yn gallu ymuno yn y dathliad ac yn cael cyfle i brofi’r pleser o fwynhau llyfrau.

LLOND SACH O LYFRAU
 
Mae’r Cyngor Llyfrau newydd gyhoeddi eu hatodiad o lyfrau, Gwledd y Nadolig, ac y mae’n llawn o’r detholiad diweddaraf o lyfrau ar gyfer yr Ŵyl.
 
Eisoes fe ddosbarthwyd yr atodiad drwy rwydwaith y papurau bro, ac fe fydd yn gymorth mawr i ddarllenwyr brwd ddod o hyd i anrhegion arbennig ar gyfer eu cyfeillion.
 
‘Unwaith eto mae yma wledd o lyfrau ar eich cyfer y Nadolig yma,’ meddai Phil Davies, Pennaeth Adran Farchnata’r Cyngor Llyfrau.  ‘Gobeithio y cewch i gyd gyfle i ddarllen y llyfrau gwych a baratowyd ar eich cyfer.’

CYFARFOD BLYNYDDOL Y CYNGOR LLYFRAU
 
Cynhaliwyd Cyfarfod Blynyddol y Cyngor Llyfrau yn Wrecsam yn ddiweddar ar wahoddiad y Maer, y Cynghorydd Aled Roberts.
 
Bu’n gyfarfod hynod lwyddiannus, a chafodd Gwerfyl Pierce Jones, Cyfarwyddwr y Cyngor Llyfrau, gyfle i gyflwyno’r Adroddiad Blynyddol i sylw’r aelodau.
 
Mae’r Adroddiad yn gyflwyniad o waith y Cyngor yn ystod y flwyddyn a gellir ei ddarllen drwy glicio YMA.

DIWRNOD Y LLYFR
 
Mae Pwyllgor Llywio Diwrnod y Llyfr eisoes wedi bod yn brysur iawn yn paratoi ar gyfer gweithgareddau y flwyddyn nesaf a gynhelir ddydd Iau, 4 Mawrth 2004.  Y mae’r pecyn gwybodaeth i ysgolion a llyfrgelloedd wrthi’n cael ei baratoi ac fe fydd yn cael ei ddosbarthu’n fuan yn y flwyddyn newydd.
 
‘Y mae’r gefnogaeth i Ddiwrnod y Llyfr yn cynyddu o flwyddyn i flwyddyn,’ meddai Delyth Humphreys, cyd-lynydd y gweithgareddau ar ran y Cyngor Llyfrau,  ‘ac mae pethau’n argoeli’n dda iawn ar gyfer y flwyddyn nesaf.  Mae ysgolion ledled Cymru eisoes wedi dechrau cysylltu â ni i drafod eu rhaglen o weithgareddau.’
 
Beth am ymuno yn hwyl y Diwrnod?  Cysylltwch â Delyth Humphreys ar (01970) 624151 neu delyth.humphreys@cllc.org.uk

Enillwyr Gwobrau Llyfrau Sgiliau Sylfaenol

Cynhaliwyd seremoni gyntaf Gwobrau Llyfrau Sgiliau Sylfaenol dan nawdd yr Asiantaeth Sgiliau Sylfaenol a Chyngor Llyfrau Cymru yng Nghaerdydd ddydd Llun 24 Tachwedd, fel rhan o Strategaeth Genedlaethol Sgiliau Sylfaenol Llywodraeth Cynulliad Cymru. Cadeirydd y panel gwobrau oedd Glenys Kinnock ASE.

Y cyhoeddwyr buddugol yw:

Gwobr i'r Prif Enillydd:
Hodder and Stoughton:
Fast Forward Maths
Hilary Koll a Steve Mills.

Gwobrau Grŵp Oedran Cynradd

Llythrennedd: llyfrau neu gyfresi sgiliau sylfaenol drwy gyfrwng y Saesneg:
A&C Black:
Go Facts: Animal Starter Pack
Paul McEvoy, Katy Pike a Sharon Dalgleish

Llythrennedd: llyfrau neu gyfresi sgiliau sylfaenol drwy gyfrwng y Gymraeg:
Y Ganolfan Astudiaethau Addysg, Aberystwyth:
Cyfres Clic 1 a 2

Deunyddiau heblaw llyfrau:
Catch Up (Prifysgol Oxford Brookes gyda chefnogaeth y Caxton Trust):
The Catch Up Programme
Dee Reid, Diana Bentley a Suzi Clipson-Boyles
Dyfal Donc Addasiad Anne Kenyon

Gwobrau Grŵp Oedran Uwchradd

Llythrennedd: llyfrau neu gyfresi sgiliau sylfaenol drwy gyfrwng y Saesneg:
Gwasg UWIC:
New Plays from Wales for Young People, awduron amrywiol

Llythrennedd: llyfrau neu gyfresi sgiliau sylfaenol drwy gyfrwng y Gymraeg:
Gwasg Gomer:
Cyfres Saeth, Awduron amrywiol

Rhifedd: llyfrau neu gyfresi naill ai yn y Gymraeg neu'r Saesneg
Hodder andStoughton:
Fast Forward Maths
Hilary Koll a Steve Mills

Gwobrau ar Gyfer Deunydd i Oedolion

Llythrennedd: llyfrau neu gyfresi sgiliau sylfaenol drwy gyfrwng y Saesneg:
Cwmni cyhoeddi David Fulton:
Literacy for Childcare Students - a Basic Skills Guide (rhan o'r gyfres Excellence in Childcare)
June Green

AIL-LANSIO TOCYNNAU LLYFRAU
 
Mae’r Cyngor Llyfrau newydd ail-lansio eu cynllun tocynnau llyfrau drwy baratoi tocynnau a chardiau newydd sbon.  Mae’r cynllun tocynnau llyfrau wedi ei hen sefydlu, ond yr oedd y Cyngor yn awyddus i roi gwedd newydd, ffres ar y cardiau.
 
‘Mae tocyn llyfr yn gallu bod yn anrheg ddelfrydol,’ meddai Phil Davies, Pennaeth Adran Farchnata’r Cyngor Llyfrau, ‘ac rydym yn hynod o falch o’r delweddau newydd sydd wedi eu paratoi.’
 
Gellir prynu’r tocynnau llyfrau newydd yn eich siop lyfrau leol.

YN ÔL I BOWYS
 
Ym Mhowys y cynhaliwyd y Gynhadledd Llyfrau Plant gyntaf un, ac y mae’n briodol bod y Cyngor Llyfrau yn dychwelyd yno eleni gyda’i chynhadledd ar ôl pum mlynedd ar hugain, a honno ar yr un thema, sef ‘Plant a’u Darllen’.
 
Unwaith eto y mae yna raglen wych o siaradwyr wedi ei pharatoi ar gyfer y cynadleddwyr.  Bydd y ddarlith agoriadol yn cael ei chyflwyno gan Alan Gibbons, awdur llwyddiannus o ardal Lerpwl.  Yn 2000 enillodd ei gyfrol Shadow of the Minotaur wobr Blue Peter.
 
Yn ogystal, fe geir cyflwyniad gan nifer o awduron ifanc yn cynnwys Gwyneth Glyn, Caryl Lewis, Nia Jones, Anwen Francis ac Aled Richards.  Yn ystod y gynhadledd, fe fydd Tlws Mary Vaughan Jones yn cael ei gyflwyno i Elfyn Pritchard am ei gyfraniad arbennig i faes llenyddiaeth plant, ac fe gyhoeddir enwau enillwyr Gwobrau Tir na n-Og.
 
‘Mae’n argoeli i fod yn gynhadledd arbennig iawn,’ meddai Menna Lloyd Williams, Pennaeth Adran Llyfrau Plant y Cyngor Llyfrau.  ‘Mae croeso i unrhyw un gysylltu â ni am fwy o fanylion ac i ymuno â ni yng ngwesty’r Metropole, Llandrindod, ar nos Wener a dydd Sadwrn, 7–8 Tachwedd.’

Y GWEINIDOG ADDYSG YN LANSIO LLYFR
 
Daeth Jane Hutt, y Gweinidog Iechyd, ar ymweliad â’r Cyngor Llyfrau’n ddiweddar i lansio llyfr a gyhoeddwyd yn arbennig i roi sylw i ymgyrch cancr y fron.
 
Mae’r llyfr Sexy Shorts for Christmas yn cynnwys casgliad o straeon byrion ac mae amrywiaeth y deunydd wedi cyfrannu at lunio cyfrol a fydd yn sicr o apelio at ddant pawb.
 
Cyhoeddir y gyfrol gan Accent Press, sef cwmni cyhoeddi newydd wedi’i leoli yn Noc Penfro. Sefydlwyd y cwmni gan Hazel Cushion, gan gyfuno’i phrofiad blaenorol o weithio ym myd cyhoeddi ac elusennau i gyhoeddi’r gyfrol.

Jane Hutt (centre) amongst some of the authors (from left) Jo Mazelis, Lynne Barrett-Lee. Lesley Cookman, Bernadine Kennedy and the publisher Hazel Cushion.
Photo - Cambrian News

MANON YMYSG FFRINDIAU
 
Bu’r cyfarfod diwethaf o Gyfeillion y Cyngor Llyfrau yn hynod lwyddiannus, pryd y bu’r Athro M. Wynn Thomas yn sgwrsio gyda’r awdur Manon Rhys am ei bywyd a’i gwaith.
 
Cafwyd cyfle i glywed Manon yn trafod ei dyddiau cynnar yn y Rhondda a’r Rhyl, gan gyfeirio at ddylanwad ei mam a’i thad ar ei gwaith.  Drwy holi treiddgar Wyn Thomas cawsom olwg bersonol ar waith yr awdur poblogaidd yma.
 
Am fwy o fanylion am Gyfeillion y Cyngor Llyfrau gellir cysylltu ag Elwyn Jones elwyn.jones@cllc.org.uk

CYHOEDDWYR CYMRU’N TARGEDU’R FARCHNAD DRAMOR
 
Fe drefnwyd seminar hawliau tramor yn ddiweddar gan Gyngor Llyfrau Cymru a Llenyddiaeth Cymru Dramor ar gyfer cyhoeddwyr o Gymru.
 
Y ddau asiant llenyddiaeth a fu’n arwain y seminar oedd Ray-Güde Mertin o Frankfurt, Yr Almaen a Tuvia Fogel o asiantaeth Il Caduceo ym Milan, Yr Eidal. Roedd eu cyflwyniadau’n llawn gwybodaeth ddefnyddiol a chynghorion ymarferol. Bu’r diwrnod yn hynod o fuddiol i’r cyhoeddwyr, ac yn enwedig i’r rhai fydd yn mynychu Ffair Lyfrau Frankfurt yn ddiweddarach eleni.
 
Noddwyd y seminar gan Masnach Cymru Dramor

ANFON LLYFR YN ANRHEG I GANADA
 
Yn ystod yr Eisteddfod Genedlaethol ym Meifod cafodd Alun Pugh, y Gweinidog dros Ddiwylliant, yr iaith Gymraeg a Chwaraeon, y cyfle i brofi apêl gwefan gwales.com drwy anfon llyfr yn anrheg i’w fodryb yng Nghanada.
 
‘Rwy’n falch fod Llywodraeth y Cynulliad wedi gallu darparu cyllid er mwyn rhoi apêl ehangach i gwales.com i gyrraedd cynulleidfa newydd,’ meddai.
 
Gyda gwybodaeth am dros 20,000 o lyfrau ar y wefan, mae’n ddull hynod effeithiol i gael yr wybodaeth ddiweddaraf am lyfrau o Gymru gyda chyfle i archebu’n ddiogel ar-lein neu drwy siop lyfrau leol.

CYSTADLAETHAU LLYFRAU CYMRAEG 2003
 
Cynhaliwyd rownd derfynol y Cystadlaethau Llyfrau Cymraeg yn Aberystwyth yn ddiweddar.  Eleni, am y tro cyntaf, roedd dwy gystadleuaeth, un ar gyfer plant Blwyddyn 3 a 4 ac un arall ar gyfer plant Blwyddyn 5 a 6.
 
Daeth 26 o dîmau i gystadlu yng Nghanolfan y Celfyddydau, Aberystwyth ac fe gafwyd diwrnod byrlymus, bywiog a llwyddiannus iawn.
 
Roedd pob tîm yn gorfod darllen stori fer a gomisiynwyd yn arbennig ar gyfer y gystadleuaeth, ac yna trafod eu syniadau amdani gyda’r beirniad.  Roedden nhw hefyd wedi paratoi cyflwyniad dramatig o lyfr o’u dewis.
 
Eleni, y tîmau a ddaeth i’r brig ym Mlwyddyn 3 a 4 oedd:
 
1af Ysgol Twm o’r Nant, Dinbych
2il Ysgol Mynydd Bychan, Caerdydd
3ydd Ysgol y Login Fach, Abertawe
Ysgol Bro Ogwr, Pen-y-bont ar Ogwr
 
Yng nghystadleuaeth Blwyddyn 5 a 6 y buddugwyr oedd:
 
1af Ysgol Edern, Gwynedd
2il Ysgol Llanddoged, Conwy
3ydd Ysgol Gymraeg Pontadawe, Nedd a Phort Talbot
 
Llongyfarchiadau i’r plant ac i’w hathrawon.

CERI WYN JONES
BARDD PLANT CYMRU 2003-2004
 
Mewn seremoni ar faes Eisteddfod yr Urdd ym Mharc Margam, fe gyhoeddwyd mai Ceri Wyn Jones yw Bardd Plant Cymru am eleni.
 
Yn enedigol o Aberteifi, y mae’r cyn-athro bellach yn gweithio ym myd llyfrau fel golygydd yng Ngwasg Gomer, Llandysul.  Y mae’n fardd o fri, ac ef a enillodd gadair yr Eisteddfod Genedlaethol yn 1997.
 
Yn ystod ei flwyddyn fel Bardd Plant Cymru fe fydd Ceri Wyn yn ymweld ag ysgolion i gynnal gweithdai barddoniaeth ac yn cyfansoddi cerdd comisiwn arbennig.  Fe fydd hefyd yn cyfrannu at wefan newydd Bardd Plant Cymru.
 
Cliciwch YMA i gael mwy o wybodaeth am Ceri Wyn.

COFIO DYLAN THOMAS (1914 – 1953)
 
Fel rhan o raglen y Cyngor Llyfrau i hybu llyfrau o Gymru dramor, mae posteri o Dylan Thomas wedi eu paratoi, a byddant i’w gweld mewn siopau llyfrau yn rhai o brifddinasoedd Ewrop.
 
‘Eleni, rydym yn coffáu marwolaeth y bardd o Abertawe hanner can mlynedd yn ôl,’ meddai Bridget Shine, Swyddog Marchnata Dramor y Cyngor Llyfrau, ‘a hyderwn y bydd cofio un o awduron enwocaf Ewrop yn ffordd effeithiol, hefyd, o gyflwyno’r darllenwyr i lyfrau eraill o Gymru’.