12 Tachwedd 2002

PENODI SWYDDOG GWYBODAETH I’R CYNGOR LLYFRAU
 
Mae’r Cyngor Llyfrau wedi penodi Swyddog Gwybodaeth newydd fydd â chyfrifoldeb am gasglu a dosbarthu gwybodaeth am yr holl lyfrau sy’n cael eu cyhoeddi yng Nghymru.
 
Mae Nia Mererid Morgan yn enedigol o Nebo, ger Llannon, Ceredigion, a chafodd ei haddysgu yn yr ysgol gynradd leol ac yn Ysgol Gyfun Aberaeron.  Graddiodd Nia yn y Gymraeg ym Mhrifysgol Gogledd Cymru, Bangor, gan fynd ymlaen i dderbyn MSc Econ mewn Astudiaethau Gwybodaeth a Llyfrgellyddiaeth ym Mhrifysgol Cymru Aberystwyth.
 
Wedi cyfnod yn gweithio fel cyfieithydd a chynorthwy-ydd golygyddol i Undeb Amaethwyr Cymru, fe’i hapwyntiwyd yn Swyddog Gwybodaeth Electronig yng Nghyngor Gwynedd gyda chyfrifoldeb am ddatblygu a hyrwyddo’r defnydd o dechnoleg y we yn y sir.  Ddwy flynedd yn ddiweddarach cafodd ei dyrchafu’n Swyddog Strategaeth Technoleg Gwybodaeth ac yna, yn 2001, ei phenodi’n Rheolwr Datblygu’r We.
 
‘Teimlaf fod gennyf gryn brofiad ym maes rheoli gwybodaeth erbyn hyn,’ meddai Nia, ‘ac rwyf yn edrych ymlaen yn fawr at y sialens newydd yma gyda’r Cyngor Llyfrau.  Rwyf hefyd yn ymwybodol iawn o’r angen sydd i lyfrwerthwyr a llyfrgellwyr, yn ogystal â’r cyhoedd, dderbyn yr wybodaeth ddiweddaraf am lyfrau o Gymru.’
 
Mae rheoli gwybodaeth yn electronig a sicrhau ei fod yn gywir yn waith holl bwysig i’r diwydiant llyfrau, ac mae Phil Davies, Pennaeth Adran Farchnata’r Cyngor, yn falch o gael croesawu Nia ar y staff.  ‘Bydd profiad Nia o reoli systemau gwybodaeth o gymorth mawr i ni,’ meddai Phil, ‘a bydd ei phrofiad o ddatblygu safleoedd ar y We o fantais wrth i ni ddatblygu gwales.com, ein safle gwybodaeth am lyfrau o Gymru, ymhellach.’
 
Mae Nia yn olynu Nia Mai Jenkins sydd wedi ei phenodi’n Swyddog Marchnata gyda Gwasg Gomer yn Llandysul.
 
Am fwy o wybodaeth cysyllter ag: Elwyn Jones, Swyddog Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion, SY23 2JB ( (01970) 624151  2 (01970) 625385  : elwyn.jones@cllc.org.uk