29 Tachwedd, 2001

AWDURON IFANC I GYHOEDDI NOFEL
Cynllun Nofel-T

Bydd criw o ffrindiau ysgol o’r canolbarth yn gwireddu breuddwyd sawl un dros yr wythnosau nesaf, gan fod yn rhan o gynllun uchelgeisiol gan S4C, Uned 5, Cyngor Llyfrau Cymru a’r Lolfa i helpu awdur i ysgrifennu nofel afaelgar i bobl ifanc.

Lansiwyd cystadleuaeth ar raglen Uned 5 rai wythnosau’n ôl i ddewis criw o bobl ifanc i gydweithio â’r awdures boblogaidd Bethan Gwanas ar y cynllun Nofel-T. Cafwyd ymateb gwych i’r gystadleuaeth, gyda dros 60 o geisiadau. Gyda chymorth yr awduron ifanc, bydd Bethan yn ysgrifennu’r nofel dros fisoedd y gaeaf, er mwyn ei chyhoeddi fis Mehefin nesaf.

Cyhoeddwyd ar raglen Uned 5 heddiw (5 o’r gloch, Dydd Iau, 29 Tachwedd) mai chwech o ffrindiau o Ysgol Gyfun Dyffryn Teifi, Llandysul, Ceredigion ddaeth i’r brig, gan blesio’r dewiswyr gyda’u personoliaethau bywiog, eu hiwmor gwreiddiol a’u cant a mil o syniadau ar gyfer y nofel. Bydd cyfle’n awr iddyn nhw gyflwyno’r holl syniadau i Bethan, fel y gall hi ddechrau ar y gwaith o ysgrifennu’r nofel.

Mae’r chwech yn ddisgyblion Blwyddyn 9 yn yr ysgol ac yn edrych ymlaen yn fawr at yr her sy’n eu hwynebu. Mae’r criw’n cynnwys Dyfed Bowen, Helen Davies, Fflur Huysmans, Ifan Rees, Seren Stacey a Gwenno Teifi.

Mae Bethan Gwanas wedi hen arfer ysgrifennu ar gyfer pobl ifanc, gan gynnwys y gyfrol Llinyn Trôns, a’r ddrama lwyfan, Awê, a hi oedd awdur y llyfr a’r gyfres deledu Amdani, a fu mor boblogaidd. Ar ôl bod yn byw ym Mangor, Caerdydd, Nigeria a Ffrainc, mae Bethan bellach wedi setlo yn ôl yn ei hardal enedigol, ger Dolgellau, ac yn canolbwyntio ar ysgrifennu.

‘Mae ysgrifennu’n gallu bod yn broses unig iawn,’ meddai Bethan. ‘Felly, dwi’n edrych ymlaen yn fawr at gael cydweithio hefo’r criw o Ysgol Dyffryn Teifi. Nhw fydd yn penderfynu ar y cymeriadau, lleoliad y stori, a’r rhan fwyaf o’r hyn sy’n digwydd. Ceisio rhoi’r cwbl i lawr ar bapur fydda i.’

Bydd digon o gyfle i’r criw drafod datblygiadau’r nofel gyda Bethan, gan y bydd yn ymweld yn gyson â’r ysgol dros yr wythnosau nesaf er mwyn cofnodi’r holl syniadau. Yna bydd Bethan yn mynd ati i ysgrifennu’r nofel, gan anfon y penodau atynt drwy’r e-bost i gael eu sylwadau.

Bydd datblygiadau’r nofel yn cael eu datgelu ar raglen Uned 5 yn ystod y cyfnod ysgrifennu, fel bod y gwylwyr gartref yn cael dilyn y cyfan. Mae’n sicr y bydd disgwyl mawr am y nofel pan fydd yn cyrraedd o’r wasg yn y gwanwyn.

‘Mae hwn yn gynllun uchelgeisiol iawn i ni,’ meddai Meirion Davies, Comisiynydd Rhaglenni Plant S4C. ‘Roedd yr ymateb gan yr ysgolion yn gwbl wych, ac mi fydd yn brofiad bythgofiadwy i’r criw gael gweithio gyda rhywun mor dalentog a phrofiadol â Bethan Gwanas.’

Dywedodd Menna Lloyd Williams o’r Cyngor Llyfrau: ‘Yr hyn a’n trawodd ni yn syth oedd bod gan y plant gymaint o syniadau gwreiddiol, a does dim dwywaith y bydd galw mawr am y nofel hon y flwyddyn nesaf.’

Ychwanegodd Mared Roberts o’r Lolfa: ‘Fel un o gyhoeddwyr mwyaf blaengar Cymru, rydym yn edrych ymlaen yn fawr at fod yn rhan o’r project cyffrous hwn, ac at weld cyhoeddi’r nofel arloesol hon yn y gwanwyn.’

Am ragor o wybodaeth cysylltwch ag:
Elwyn Jones, Cyngor Llyfrau Cymru: 01970 624151
Bethan Gwanas: 01341 450230
Uned 5: 01286 678592
Ysgol Dyffryn Teifi: 01559 362310