ANFON LLYFRAU I’R WLADFA
 
Bydd ysgolion Cymraeg yn y Wladfa yn derbyn cyflenwad o lyfrau yn rhad ac am ddim, diolch i garedigrwydd dau sefydliad a haelioni cyhoeddwyr o Gymru. Mewn cynllun a drefnwyd gan Gyngor Llyfrau Cymru, fe fydd cyflwyno dros fil o lyfrau ac adnoddau addysgol gwerth bron i £7,000 yn fodd i athrawon yn y Wladfa dderbyn cyflenwad gwych o adnoddau.
 
‘Roeddem yn hynod falch i gael cynorthwyo’r disgyblion ym Mhatagonia gyda’u hymdrech arbennig i ddysgu’r Gymraeg,’ meddai Helgard Krause, ar ran y Cyngor Llyfrau.
 
Mae cymorth ariannol hael Cymdeithas Cymru-Ariannin a’r Cyngor Prydeinig wedi ei ategu gan y Cyngor Llyfrau a nifer o’r cyhoeddwyr.
 
Cafodd y rhestr gynhwysfawr o lyfrau ei dethol gan y Cyngor Llyfrau, gyda’r dewis terfynol yn cael ei gadarnhau gan Ms Esyllt Nest Roberts, athrawes ym Mhatagonia, a ymwelodd yn ddiweddar â’r Cyngor Llyfrau yn Aberystwyth.  Mae swydd Ms Roberts wedi ei noddi dan gynllun y Gymraeg yn Chubut, cynllun a weinyddir gan y Cyngor Prydeinig a’i ariannu gan Lywodraeth Cynulliad Cymru.
 
Dywedodd Alun Pugh, y Gweinidog dros Ddiwylliant, y Gymraeg a Chwaraeon, ‘Rwyf wedi gweld drosof fy hunan y gwaith gwych mae’r cynllun yn ei wneud i sicrhau fod y Gymraeg yn parhau’n iaith fyw ym Mhatagonia.  Mae’r cyfraniad hwn yn adnodd gwych i gefnogi’r rhai sy’n dysgu’r iaith yno.’
 
Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, Aberystwyth, Ceredigion  SY23 2JB T (01970) 624151  F (01970) 625385  E elwyn.jones@cllc.org.uk
Esyllt Nest Roberts – ( 0054 2965 491409 esylltnest@yahoo.co.uk
Cymdeithas Cymru-Ariannin – www.cymru-ariannin.org
 
Cyflwynwyd llyfrau am ddim i’r ysgolion ym Mhatagonia gan y cyhoeddwyr isod:
 
Gwasg Addysgol Cymru, Caerdydd
B-Dag, Caerdydd
CAA, Aberystwyth
Carreg Gwalch, Llanrwst
CBAC, Caerdydd
Cyhoeddiadau’r Gair, Bangor
Cymdeithas Lyfrau Ceredigion, Aberystwyth
Cymdeithas y Beibl, Swindon
Drake, Caerdydd
Dref Wen, Caerdydd
Gomer, Llandysul
Gwasg Gwynedd, Caernarfon
Hughes, Caerdydd
Mudiad Ysgolion Meithrin, Aberystwyth
Gwasg Prifysgol Cymru, Caerdydd
Sain, Caernarfon
Tympan, Caerdydd
Y Lolfa, Tal-y-bont
 
 

Elvey MacDonald (chwith), Ceris Gruffudd ac Esyllt Nest Roberts yn dethol llyfrau ar gyfer Patagonia.