MAE DYN Y TRAED MAWR YN 25 OED –
PEN-BLWYDD HAPUS, JAC Y JWC!

Mae miloedd o blant ifanc ar hyd a lled Cymru wedi derbyn gwahoddiad arbennig i lunio cardiau i ddathlu pen-blwydd Jac y Jwc, sy'n 25 oed eleni!

Un o'r cymeriadau hoffus a grëwyd gan Mary Vaughan Jones a Jac Jones yw Jac y Jwc, a gwelodd olau dydd am y tro cyntaf yn 1977 mewn dwy gyfrol a gyhoeddwyd gan Gymdeithas Lyfrau Ceredigion. Dros y blynyddoedd mae Llyfr Bach Jac y Jwc a Llyfr Mawr Jac y Jwc wedi gwerthu miloedd ar filoedd o gopïau.

Clwb Llyfrau Sbri-di-ri, un o glybiau plant Cyngor Llyfrau Cymru, sydd wedi anfon y gwahoddiad i bob plentyn, cylch meithrin ac ysgol sy'n derbyn taflenni lliwgar y clwb yn rheolaidd. Mae yna gynnig arbennig arall i brynwyr y clwb y tymor hwn hefyd: bydd pob un o lyfrau Jac y Jwc a brynir o daflen Sbri-di-ri Hydref 2002 yn cynnwys ei lofnod.

Bellach, mae'r Llyfr Bach, y Llyfr Mawr a Rhigymau Jac y Jwc yn ôl mewn print ac mae'n sicr y byddant yn cael derbyniad gwresog gan genhedlaeth newydd o blant Cymru. Yn sicr, mae rhieni'r chwarter canrif ddiwetha wedi bod wrth eu bodd yn rhannu'r storïau am Jac gyda'u plant. Un o'r rhieni yma, sy'n wyneb cyfarwydd iawn ar y teledu ac ar lwyfannau Cymru, yw Martyn Geraint, sy'n dad i dri o blant ac yn ymwybodol iawn o bwysigrwydd llyfrau a darllen yn natblygiad plentyn. 'Mae Jac y Jwc yn esiampl wych o sut y gall un cyfrwng hybu'r llall,' meddai Martyn. 'Trwy gyfresi teledu a sioeau byw, mae S4C wedi dod â'r cymeriad lliwgar a hoffus hwn yn fyw i filoedd o blant ar hyd a lled Cymru. Mae hyn yn ei dro wedi sbarduno'r plant i ddarllen y llyfrau sy'n llawn o'i helyntion difyr a doniol. Ac i goroni'r cyfan, mae'n braf cael galw un o gymeriadau mwyaf enwog llyfrau Cymru yn ffrind!'

Dywedodd Delyth Humphreys, swyddog clybiau'r Cyngor Llyfrau, 'Ry’n ni' n falch dros ben fod Sbri-di-ri, clwb llyfrau'r plant 3–7 oed, yn rhan o ddathliadau pen-blwydd mor arbennig â hwn. Rwy'n sicr y byddwn yn derbyn cannoedd, os nad miloedd, o gardiau pen-blwydd a gobeithiwn yn fawr y bydd y llyfrau sy'n cario llofnod Jac y Jwc yn gwerthu fel slecs!'

Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion, SY23 2JB.
Ffôn: (01970) 624151 Ffacs: (01970) 625385 : elwyn.jones@cllc.org.uk