13 Ionawr 2004
 
WYNEBAU NEWYDD YN Y CYNGOR LLYFRAU
 
Penodwyd dau berson newydd i staff Adran Farchnata’r Cyngor Llyfrau yn ddiweddar, un i fod yn gyfrifol am y Cynllun Ymestyn a’r llall i ymweld â siopau llyfrau yn Ne-ddwyrain Cymru.
 
Mae Emma Evans yn enedigol o Benrhyn-coch, ger Aberystwyth, ac ar ôl dilyn cwrs mewn Cyfathrebu a’r Cyfryngau ym Mhrifysgol Cymru Bangor, bu’n gweithio am gyfnod gyda chwmni cysylltiadau cyhoeddus Strata Matrix.  Emma fydd yn gyfrifol am weinyddu’r Cynllun Ymestyn, y cynllun i hybu llyfrwerthwyr i gynnal stondinau llyfrau mewn digwyddiadau ledled Cymru.
 
‘Rwy’n gobeithio’n fawr y bydd trefnwyr digwyddiadau trwy Gymru yn manteisio ar y cynllun llwyddiannus hwn, ac mae croeso iddyn nhw gysylltu â ni yn y Cyngor Llyfrau yn Aberystwyth am fwy o wybodaeth,’ meddai Emma. 
 
Mae Dilwyn Phillips yn adnabyddus i nifer o lyfrwerthwyr drwy Gymru eisoes gan iddo fod yn ymweld â siopau llyfrau ar ran Y Lolfa.  Dilwyn fydd cynrychiolydd y Cyngor yn ardal y De-ddwyrain a bydd yn casglu archebion llyfrau gan y llyfrwerthwyr.
 
‘Rydym yn falch o gael croesawu’r ddau yn aelodau o staff yr Adran,’ meddai Phil Davies, Pennaeth Adran Farchnata’r Cyngor Llyfrau, ‘gan ychwanegu at y tîm egnïol sy’n hyrwyddo llyfrau drwy Gymru.’
 
Llais arall fydd yn dod yn gyfarwydd i lyfrwerthwyr Cymru fydd un Margaret Evans, gan iddi hi gael ei phenodi’n ddiweddar ar staff y Ganolfan Ddosbarthu yn Aberystwyth i ddelio ag archebion dros y ffôn.