CREU CERDDI MEWN TIPI! (29 Awst 2003)
 


Tipis llwyth y Sioux yw’r lleoliad diweddara i gynnig ysbrydoliaeth i feirdd ifanc Cymru!
 
Cafodd plant o Ysgol Gymraeg Brynsierfel, Llwynhendy, Llanelli, gyfle i fod yn rhan o weithdy barddoniaeth gyda Menna Elfyn yn y tipis sydd ar fferm yr Hendre, Blaenannerch. Trefnwyd y sesiwn er mwyn gwobrwyo’r ysgol am ei chefnogaeth i Glwb Llyfrau Sbondonics.
 
Sbondonics yw’r Clwb Llyfrau Cymraeg ar gyfer plant 7 i 11 oed a drefnir gan Gyngor Llyfrau Cymru. Mae 32,000 o daflenni gwerthu lliwgar y clwb yn cael eu dosbarthu bob tymor i blant ym mhob cwr o Gymru.  Yn 2002–2003, gwerthwyd dros 23,000 o lyfrau trwy’r clybiau llyfrau Cymraeg, gan ddod â chyfanswm y gwerthiant i fwy na £100,000 am y tro cynta erioed.
 
‘Roedd yn addas iawn ein bod ni’n cynnal gweithdy barddoniaeth yn fferm yr Hendre, gan mai dyma gartre’r Prifardd Dic Jones,’ meddai Delyth Humphreys, Swyddog Clybiau Llyfrau Plant y Cyngor Llyfrau. ‘Diolch i gwmni Tipi West am leoliad gwych!’
 
Yn y llun, gwelir disgyblion Ysgol Brynsierfel, Llwynhendy, mewn gweithdy barddoniaeth gyda Menna Elfyn, Bardd Plant Cymru 2002–2003, yn Tipi West, Blaenannerch, Ceredigion.

Am fwy o wybodaeth am y Clybiau Llyfrau Plant, cysylltwch â Delyth Humphreys (01970 624151 delyth.humphreys@cllc.org.uk). 
 
Am fwy o wybodaeth am Tipi West ewch i’r wefan www.tipiwest.co.uk neu ffoniwch 07813 672336.
 
Menna Elfyn oedd Bardd Plant Cymru 2002–2003.  Cynllun i hyrwyddo barddoniaeth ymhlith plant a phobl ifanc yw Bardd Plant Cymru, a chaiff ei drefnu ar y cyd rhwng S4C, Cyngor Llyfrau Cymru, yr Urdd a’r Academi.