LLYFRAU O GYMRU AR WERTH YN TESCO
 
Fel rhan o’u rhaglen i hyrwyddo cynnyrch o Gymru, cyhoeddodd Tesco heddiw (8 Mai) y byddant yn stocio ystod eang o lyfrau gan brif weisg Cymru yn eu siopau o hyn ymlaen.  Fe fydd y detholiad o deitlau yn cynnwys llyfrau Cymraeg yn ogystal â llyfrau Saesneg o ddiddordeb Cymreig, gan gynnwys teitlau ar gyfer plant, ieuenctid ac oedolion.
 
Fel rhan o’r cyhoeddiad heddiw, fe ymwelodd Jenny Randerson, y Gweinidog dros Ddiwylliant, Chwaraeon a’r Iaith Gymraeg, â siop Tesco yng Nghroes Cwrlwys, Caerdydd, gan longyfarch pawb ar y fenter newydd.
 
Dywedodd Mrs Randerson: ‘Mae’r hen ddihareb – “Gorau cof, cof llyfr” – yn hollol gywir.  Fe fydd y cynllun yma nid yn unig yn gymorth i ddarllenwyr gael gafael ar y llyfrau o safon a gynhyrchir yng Nghymru, ond fe fydd hefyd yn ffordd wych o hyrwyddo treftadaeth a diwylliant Cymru.  Mae’n holl bwysig bod llyfrau ar gael mewn ystod eang o lefydd, o lyfrgelloedd i archfarchnadoedd, i nodi pwysigrwydd darllen ar gyfer hamdden a dysgu.  Bydd cael y llyfrau hyn yn siopau Tesco, yn Gymraeg a Saesneg, yn rhoi’r cyfle i gynulleidfa ehangach fwynhau’r ddarpariaeth sydd ar gael.’
 
Caiff y fenter newydd ei lansio gyda’r llyfrau’n cael eu gwerthu ym mhrif siopau Tesco o Gaerdydd i Gaernarfon, gyda’r bwriad o ehangu’r ddarpariaeth dros y misoedd nesaf.
 
Dywedodd Meinir Phillips, Pennaeth Marchnata (Cymru) ar ran siopau Tesco, ac un sydd wedi bod yn gyfrifol am ddatblygu’r cynllun: ‘Rydym bob amser yn falch o’r cyfle i hyrwyddo cynnyrch o Gymru yn ein siopau, ac felly mae’n hollol naturiol i ni fod yn gwerthu llyfrau o Gymru, yn y ddwy iaith.  Hyderwn yn fawr y bydd cynulleidfa newydd eto yn cael cyfle i weld y dewis gwych o lyfrau sydd ar gael.’
 
Wrth groesawu’r datblygiad newydd yma dywedodd Gwerfyl Pierce Jones, Cyfarwyddwr Cyngor Llyfrau Cymru: ‘Rydym yn croesawu unrhyw ddatblygiad sy’n golygu y bydd cyfle i fwy o bobl brynu llyfrau o Gymru.  Rydym yn hynod falch o’r ddarpariaeth o lyfrau Cymraeg a Chymreig sydd ar gael y dyddiau hyn ac yn llongyfarch Tesco am weld y cyfle i hyrwyddo cynnyrch Cymru.’
 
I gofnodi achlysur y cyhoeddiad yn siop Tesco, Croes Cwrlwys, fe gafodd criw o blant o Ysgol Gynradd Pwll Coch, Caerdydd, gyfle i ymweld â’r siop ac i gymryd rhan mewn sesiwn stori.
 
 
Am fwy o wybodaeth cysyllter ag:
Elwyn Jones, Pennaeth Gweinyddiaeth a Chysylltiadau Cyhoeddus,
Cyngor Llyfrau Cymru, Castell Brychan, ABERYSTWYTH, Ceredigion  SY23 2JB
Ffôn (01970) 624151 Ffacs (01970) 625385 E-bost elwyn.jones@cllc.org.uk