ENILLYDD GWOBR TIR NA N-OG 2001

Cyhoeddodd y Cyngor Llyfrau heddiw (4 Hydref) mai enillydd Llyfr Saesneg Gorau'r Flwyddyn 2001 yw The Seeing Stone, Kevin Crossley-Holland (Orion Children's Books).

Cyflwynir gwobrau Tir na n-Og yn flynyddol gan y Cyngor Llyfrau i anrhydeddu gwaith awduron ac arlunwyr llyfrau plant, gyda'r enillwyr yn derbyn gwobr o �1,000 yr un.

Mae Kevin Crossley-Holland yn enw adnabyddus ym maes llenyddiaeth plant, yn arbennig am ei waith yn ail-gyflwyno chwedlau traddodiadol. Ymhlith ei gyfrolau y mae British Folk Tales a The Penguin Book of Norse Myths.

Bu'r awdur yn gweithio ym maes cyhoeddi am rai blynyddoedd, ac y mae hefyd wedi cynhyrchu a chyflwyno nifer o raglenni radio i�r BBC. Y mae bellach yn byw yn Norfolk, yn agos at y môr, lle y bu'n aros gyda'i daid a'i nain pan oedd yn blentyn. Mae wedi cyhoeddi saith cyfrol o farddoniaeth i oedolion, ond am ei waith yn ysgrifennu llyfrau plant y mae'n fwyaf adnabyddus. Bu'n cydweithio hefyd gyda'r Athro Gwyn Thomas ar gyfrolau megis Tales From the Mabinogion, The Quest For Olwen a The Story of Taliesin.

The Seeing Stone yw'r gyfrol gyntaf mewn trioleg sy'n cysylltu hanes y Brenin Arthur a'r bywyd canoloesol. Adroddir y stori yn y llyfr gan fachgen ifanc o'r enw Arthur de Caldicot, sy'n byw ar y Gororau yn y flwyddyn 1199, a chawn rannu ei obeithion a'i ofnau wrth iddo ddod yn farchog. Drwy'r cyfan mae stori'r Brenin Arthur ei hun yn cael ei hadrodd yn gelfydd.

Mae'r llyfr wedi ennill y Guardian Children�s Book Award, a gwobr efydd y Smarties Prize, ac y mae'n un o'r llyfrau sydd wedi ei enwi ar restr fer y Whitbread Children's Book of the Year.

�Rydym yn hynod falch ein bod yn cyflwyno'r wobr am Lyfr Saesneg Gorau'r Flwyddyn i awdur mor nodedig,' meddai Menna Lloyd Williams, Pennaeth Adran Llyfrau Plant y Cyngor.

Am ragor o wybodaeth cysyllter ag Elwyn Jones, Swyddog Marchnata, Cyngor Llyfrau Cymru, Castell Brychan, ABERYSTWYTH, Ceredigion SY23 2JB
Ffôn: 01970 624151 e-bost: elwyn.jones@cllc.org.uk
Kevin Crossley-Holland: 01328 730167