National Year of Rading Wales Y Cyngor English Version Llyfrau Plant Map y Safle Am Lyfrau Cysylltiadau Gwasanaethau Cartref Pa Newydd
 
Croeso
Swyddi
Newyddion
Datganiadau
Tlysau
Mewn Print
 
 

11 Hydref 2001

DAU AWDUR POBLOGAIDD YN CIPIO GWOBRAU
TIR NA N-OG 2001

Dau awdur poblogaidd sydd wedi ysbrydoli miloedd o blant i fwynhau llyfrau a barddoniaeth yw enillwyr gwobrau Tir na n-Og eleni.

BETHAN GWANAS, awdur y nofel lwyddiannus Amdani, a'r gyfres o'r un enw a ddarlledir ar S4C, yw enillydd y wobr am Ffuglen Orau'r Flwyddyn. Enillodd y wobr am y gyfrol Llinyn Trôns (Y Lolfa), ac ynddi ceir hanes gwrthdaro a chyfeillgarwch ymysg criw brith o ddisgyblion TGAU ar gwrs mewn canolfan awyr agored. Mae'r gyfrol eisoes wedi gwerthu dros 1,600 o gopïau.

Yn enedigol o Ddolgellau, bu Bethan yn byw yn Ffrainc am flwyddyn cyn gwneud cyfnod o waith gwirfoddol yn Nigeria. Bu'n dysgu am gyfnod, ac yn gweithio i'r Urdd a Radio Cymru; bellach mae hi'n ysgrifennu'n llawn amser ac yn hyrwyddo gweithgareddau darllen yng Ngwynedd.

Enillydd Gwobr Llyfr Gorau'r Flwyddyn ac Eithrio Ffuglen yw MYRDDIN AP DAFYDD am y gyfrol o farddoniaeth Jam Coch Mewn Pwdin Reis (Hughes). Myrddin oedd y cyntaf i dderbyn yr anrhydedd o fod yn Fardd Plant Cymru, yn 2000, a thrwy ei waith fel Rheolwr Gyfarwyddwr Gwasg Carreg Gwalch, Llanrwst, mae wedi gwneud mwy na neb i hybu barddoniaeth ymysg plant a phobl ifanc.

Yn ystod ei gyfnod fel Bardd Plant Cymru 2000, ysgrifennodd Myrddin nifer o gerddi i gofnodi'r achlysur, yn ogystal â chynnal gweithdai barddoniaeth mewn ysgolion ledled Cymru. Mae'r gyfrol Jam Coch Mewn Pwdin Reis yn ffrwyth ei gyfnod llwyddiannus fel Bardd Plant Cymru, ac mae'n cynnwys cerddi ganddo ef ei hun yn ogystal â nifer o gerddi'r plant.

Cyflwynir gwobrau Tir na n-Og yn flynyddol gan y Cyngor Llyfrau i anrhydeddu gwaith awduron ac arlunwyr llyfrau plant, gyda'r enillwyr yn derbyn gwobr o �1,000 yr un. Darlledwyd y seremoni'n fyw ar raglen blant S4C, Uned 5, ddydd Iau, 11 Hydref.

Enillwyr Gwobrau Tir na n-Og 2001

Ffuglen Orau'r Flwyddyn
Llinyn Trôns, Bethan Gwanas (Y Lolfa)

Llyfr Gorau'r Flwyddyn ac Eithrio Ffuglen
Jam Coch Mewn Pwdin Reis, Myrddin ap Dafydd (Hughes)

Am ragor o wybodaeth cysyllter ag Elwyn Jones, Swyddog Marchnata, Cyngor Llyfrau Cymru, Castell Brychan, ABERYSTWYTH, Ceredigion SY23 2JB Ffôn: 01970 624151 e-bost: elwyn.jones@cllc.org.uk

Gellir cysylltu â Bethan Gwanas ar 01341 422771 ac â Myrddin ap Dafydd ar 01492 642031.

  {(}
{)}