9 Hydref 2002

GWOBRAU TIR NA N-OG 2002

Cyhoeddwyd enwau enillwyr gwobrau Tir na n-Og 2002 yn fyw heddiw (9 Hydref) ar y rhaglen deledu ‘Gwobrau Tir na n-Og 2002’ ar S4C.

Enillydd Ffuglen Orau’r Flwyddyn yw SHONED WYN JONES am y gyfrol Gwirioni (Y Lolfa), nofel gyfoes rymus i’r arddegau yn ymwneud â chymhlethdodau perthynas a’r problemau a gafwyd yn sgil y berthynas honno.

Daw Shoned Wyn Jones o Ddyffryn Ogwen yn wreiddiol. Mae’n Bennaeth Adran y Gymraeg yn Ysgol John Bright, Llandudno. Eisoes cyhoeddodd ddwy nofel ar gyfer yr arddegau, sef Adlais a Fory Ddaw.

Enillwyr y wobr am Lyfr Gorau’r Flwyddyn ac Eithrio Ffuglen yw NON AP EMLYN a MARIAN DELYTH am y gyfrol o farddoniaeth Poeth! (Y Lolfa), cyfrol arbennig o safonol sy’n gyfuniad o gerddi ffres ac amrywiol a diwyg modern a chyfoes.

Y mae Non ap Emlyn, golygydd y gyfrol, yn arbenigo ym maes dysgwyr ac wedi cyhoeddi nifer o lyfrau ac adnoddau ar gyfer dysgwyr. Y mae hefyd yn addasydd profiadol ac wedi addasu nifer fawr o lyfrau i’r Gymraeg ar gyfer y plant lleiaf.

Dyluniwyd y gyfrol gan Marian Delyth, ffotograffydd a dylunydd proffesiynol. Yr oedd yn un o gyd-enillwyr gwobr Tir na n-Og ym 1996 am y gyfrol Sbectol Inc. Y llynedd cyhoeddodd gyfrol hardd ar y cyd â Dr Gwynfor Evans, sef Cymru o Hud.

Dyfarnwyd y wobr am y llyfr Saesneg gorau i MALACHY DOYLE am ei gyfrol Georgie (Bloomsbury), nofel wedi’i lleoli mewn cartref plant yng ngogledd Cymru. Mae’r nofel yn tynnu oddi ar brofiad personol yr awdur o weithio mewn ysgolion i blant ag anghenion arbennig.

Wedi’i eni yn Ngogledd Iwerddon, y mae Malachy Doyle a’i deulu yn byw yng Nghymru ers 1984. Ac yntau’n awdur toreithiog, roedd ei gyfrol Owen and the Mountain ar restr fer Tir na n-Og y llynedd. Cyhoeddodd hefyd rai llyfrau wedi eu seilio ar chwedlau Cymru.

‘Roedd tasg anodd iawn yn wynebu’r beirniad eto eleni,’ meddai Menna Lloyd Williams, Pennaeth Adran Llyfrau Plant y Cyngor Llyfrau. ‘Y mae’r llyfrau sydd wedi cyrraedd y brig yn arwydd o safon arbennig llyfrau plant yng Nghymru y dyddiau hyn a hefyd o’r ystod eang o lyfrau sydd ar gael. Rydym yn hynod falch o gael llongyfarch yr enillwyr yn wresog ar eu camp.’

Cyflwynir gwobrau Tir na n-Og yn flynyddol gan y Cyngor Llyfrau i anrhydeddu gwaith awduron ac arlunwyr llyfrau plant, gyda’r enillwyr yn derbyn gwobr o £1,000 yr un. Yn dilyn y cyhoeddiad ar y rhaglen deledu ‘Gwobrau Tir na n-Og 2002’ heddiw, fe fydd yr enillwyr hefyd yn cael eu hanrhydeddu yn ystod Cynhadledd Llyfrau Plant y Cyngor Llyfrau (2 Tachwedd 2002) yng nghwmni Jenny Randerson, y Gweinidog dros Ddiwylliant, Chwaraeon a’r Iaith Gymraeg.

Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion, SY23 2JB.
Ffôn: (01970) 624151 Ffacs: (01970) 625385 : elwyn.jones@cllc.org.uk