10 Ionawr 2005
 
GWERTHIANT LLYFRAU’N TORRI POB RECORD
 
Cyhoeddodd Cyngor Llyfrau Cymru heddiw bod gwerthiant llyfrau’r Nadolig wedi torri pob record, gyda chynnydd o 20% yng ngwerthiant Tachwedd a Rhagfyr o’i gymharu â’r flwyddyn flaenorol.
 
‘Cafwyd gwerthiant arbennig iawn ym mis Tachwedd,’ meddai Gwerfyl Pierce Jones, Cyfarwyddwr y Cyngor Llyfrau, ‘pryd y gwelwyd y llyfrau newydd yn cyrraedd y siopau’n gynnar ar gyfer y farchnad Nadolig.  Y sialens i ni wedyn oedd cynnal y cynnydd yn y gwerthiant drwy gydol mis Rhagfyr.  Rydym yn hynod falch o gael nodi bod y detholiad gwych o lyfrau – a’r ymdrechion ychwanegol i hyrwyddo llyfrau yn y wasg a’r cyfryngau – wedi cyfrannu at y galw, gan sicrhau Nadolig llwyddiannus i’r diwydiant llyfrau yng Nghymru.’
 
Llwyddwyd i gyrraedd gwerthiant o £1,057,342 drwy Ganolfan Ddosbarthu’r Cyngor Llyfrau yn ystod misoedd Tachwedd a Rhagfyr.
 
Wrth longyfarch holl sectorau’r fasnach lyfrau yng Nghymru ar eu llwyddiant, dywedodd Alun Pugh, y Gweinidog dros Ddiwylliant, y Gymraeg a Chwaraeon:  ‘Mae’r ffigurau hyn yn hwb sylweddol i’r fasnach lyfrau yng Nghymru.  Y flwyddyn hon, fe gynyddodd Llywodraeth y Cynulliad y nawdd ar gyfer hyrwyddo a marchnata llyfrau o Gymru ac mae’n dda gweld bod y cynlluniau’n dwyn ffrwyth.’
 
Am fwy o wybodaeth cysyllter ag: Elwyn Jones, Swyddog Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion, SY23 2JB ( (01970) 624151  2 (01970) 625385  : elwyn.jones@cllc.org.uk