21 Gorffennaf, 2004

Y GYMRAEG YN TYFU!
 
Bydd y cymeriad hoffus Tomos Twf yn rhan o ymgyrch drwy Gymru i gynorthwyo rhieni i gyflwyno’r Gymraeg i’w plant.
 
Mae’r cynllun, a weithredir ar y cyd rhwng Cyngor Llyfrau Cymru a Twf, sef y prosiect  sy’n annog rhieni i fagu eu plant yn ddwyieithog, yn ymateb i gais gan rieni i’w cynorthwyo i ddewis llyfrau addas i’w cyflwyno i’w plant ac yn cyd-fynd  â strategaeth iaith y Cynulliad Cenedlaethol.
 
Un o’r rhieni fydd yn manteisio ar y cyfle i gyflwyno’r Gymraeg i’w phlentyn fydd Tanni Grey Thompson:

‘Does dim byd yn well na chael hanner awr fach dawel i ddarllen gyda Carys,’ meddai.  ‘Mae 'na gymaint o lyfrau Cymraeg lliwgar, pert o gwmpas. Mae e'n rhoi teimlad cynnes, braf ac mae'n gyfle i fi wella 'Nghymraeg a dysgu 'chydig i Carys.’Mae’r llyfryn arbennig Dewch i Ddarllen Gyda’ch Plentyn, sy’n cynnwys lluniau cartw?n o’r cymeriad Tomos Twf, yn rhestru llyfrau syml dwyieithog, y gall rhieni nad ydynt yn Gymry Cymraeg ddarllen gyda’u plant. Mae’r llyfryn hefyd yn cynnwys canllawiau a phosau syml i gyflwyno’r Gymraeg yn y cartref.
 
Dywedodd Meryl Pierce, Swyddog Prosiect Twf: ‘Mae’r llyfryn yn ymgais gennym i rannu’r neges gyda rhieni nad oes raid ichi fod yn gallu siarad Cymraeg er mwyn rhannu llyfr Cymraeg gyda’ch plentyn.  Rhoi cynnig arni sy’n bwysig, a pheidio bod ag ofn gwneud camgymeriadau.  Mae digon o syniadau ymarferol yn y llyfryn ar sut i fynd ati, ac o roi’r Gymraeg i’r plentyn fe wyddom y bydd ar ei ennill o’r dechrau un.’
 
Fe ddosberthir y llyfryn yn rhad ac am ddim drwy rwydwaith Cyngor Llyfrau Cymru, Twf, Mudiad Ysgolion Meithrin, Cymdeithas Cylchoedd Chwarae Cyn-ysgol Cymru,  llyfrgelloedd a siopau.
 
Ychwanegodd Lila Piette, ar ran y Cyngor Llyfrau: ‘Gyda’r Eisteddfod Genedlaethol yn ymweld ag ardal Casnewydd eleni, y mae’n hynod briodol ein bod yn cyhoeddi llyfryn i gynorthwyo rhieni ifanc i gyflwyno’r Gymraeg i’w plant. Mewn ardal fel hon rydym yn ymwybodol iawn o awydd rhieni i helpu’u plant i ddefnyddio’r Gymraeg ac rydym yn falch o gael bod yn rhan o gynllun all wneud hyn mewn ffordd ymarferol.’
 
Mae’r holl lyfrau yn y daflen ar werth mewn siopau llyfrau ac ar gael hefyd dros y we ar www.gwales.com.
 
Gellir archebu copïau o’r llyfryn trwy gysylltu â Lila Piette yn y Cyngor Llyfrau  (01970) 624151.
 
 
Am fwy o wybodaeth cysyllter ag: Elwyn Jones, Pennaeth Gweinyddiaeth a Chysylltiadau Cyhoeddus, Cyngor Llyfrau Cymru, Castell Brychan, ABERYSTWYTH, Ceredigion, SY23 2JB ( (01970) 624151  2 (01970) 625385  : elwyn.jones@cllc.org.uk