31 Hydref, 2002

DYCHWELYD I GYMRU I HYBU LLYFRAU
 
Mae Cymraes a fu’n gweithio i bapur newydd y Telegraph yn Llundain am dros ddeuddeng mlynedd wedi dychwelyd i Gymru i weithio gyda’r Cyngor Llyfrau.
 
Mae Wendy Morris, sy’n enedigol o Aberystwyth, wrth ei bodd yn cael dychwelyd i’w thref enedigol ac eisoes wedi dechrau ar ei swydd fel Uwch Swyddog Gwerthiant yn goruchwylio gwaith y cynrychiolwyr sy’n ymweld â’r siopau llyfrau ledled Cymru.
 
Mae gan Wendy brofiad helaeth ym maes gwerthu, gan iddi fod yng ngofal hyfforddi a rheoli rhai o brif dimau gwerthu hysbysebion y Telegraph.
 
‘Rwyf yn gyfarwydd iawn â’r sgiliau sydd eu hangen ar gyfer gwerthu,’ meddai Wendy, ‘ac rwy’n edrych ymlaen yn fawr at gael y cyfle i ddefnyddio’r sgiliau hyn i hybu llyfrau o Gymru.  Gan fy mod wedi bod i ffwrdd o Gymru am gynifer o flynyddoedd, doeddwn i ddim yn sylweddoli bod y dewis o lyfrau wedi ehangu gymaint dros y blynyddoedd.  Mae’n wych gweld y dewis anhygoel sydd ar gael y dyddiau hyn.’
 
Dyma’r tro cyntaf i’r Cyngor Llyfrau benodi person yn arbennig i arwain gwaith y tîm o bedwar cynrychiolydd, ac y mae’n ddatblygiad sy’n cael ei groesawu’n fawr gan Phil Davies, Pennaeth yr Adran Farchnata.
 
‘Mae ein cynrychiolwyr yn cynnig gwasanaeth arbennig o dda i’r llyfrwerthwyr a’r cyhoeddwyr,’ meddai Phil Davies, ‘ac mae penodi Wendy yn dangos ein hymrwymiad i ddatblygu’r gwasanaeth.’

Am ragor o wybodaeth cysylltwch ag:
Elwyn Jones, Cyngor Llyfrau Cymru: 01970 624151
Bethan Gwanas: 01341 450230
Uned 5: 01286 678592
Ysgol Dyffryn Teifi: 01559 362310