18 Ionawr, 2002

CYFLE I’R CYHOEDD NODI EU HYMATEB I LYFRAU
 
Ar ddechrau’r flwyddyn newydd lansiodd y Cyngor Llyfrau gynllun cyffrous i sicrhau sylw pellach i lyfrau o Gymru.
 
O hyn ymlaen bydd modd i’r cyhoedd nodi eu hymateb eu hunain i unrhyw un o’r miloedd o lyfrau sy’n cael eu rhestru ar wefan y Cyngor — www.gwales.com — gan ehangu’r cyfle i drafod llyfrau o Gymru. Erbyn hyn mae dros 18,000 o deitlau ar y gronfa.
 
Y mae’r datblygiad diweddaraf hwn yn ychwanegol at yr adolygiadau o deitlau penodol a welir ar www.gwales.com. Mae bron i 400 o adolygiadau eisoes i’w gweld ar y safle, a bydd y cynllun yn parhau yn ystod y flwyddyn hon gan sicrhau 1,000 o adolygiadau erbyn diwedd Mawrth 2003.
 
Mae cyfle bellach i’r darllenwyr astudio’r adolygiadau a sylwadau’r cyhoedd, yn ogystal â chael gwybodaeth lyfryddol a gweld lluniau o  gloriau’r holl deitlau. Gellir hefyd archebu copïau trwy siop o’ch dewis.
 
‘Rydym yn sicr y bydd nifer fawr o’r darllenwyr yn falch iawn o’r cyfle i gael nodi eu hymateb i’r llyfrau y maent wedi eu mwynhau,’ meddai Phil Davies, Pennaeth Marchnata’r Cyngor Llyfrau. ‘Mae’r datblygiad hwn hefyd yn enghraifft dda o sut y mae modd defnyddio’r dechnoleg ddiweddaraf i hybu diddordeb mewn llyfrau a darllen.’
 
Am fwy o wybodaeth cysyllter ag: Elwyn Jones, Swyddog Marchnata, Cyngor Llyfrau Cymru, Castell Brychan, Aberystwyth, Ceredigion, SY23 2JB
T (01970) 624151
F (01970) 625385
elwyn.jones@cllc.org.uk