9
Ebrill, 2001
ARIAN I HYBU LLYTHRENNEDD
Y mae’r Cyngor Llyfrau wedi cael cadarnhad gan y
Cynulliad Cenedlaethol ei fod i dderbyn arian ychwanegol
ar gyfer dau gynllun llythrennedd fel estyniad o weithgareddau
Diwrnod y Llyfr. Hwn yw’r tro cyntaf i Bwyllgor Llywio
Diwrnod y Llyfr dderbyn arian ar gyfer cynlluniau penodol
i hyrwyddo llythrennedd.
Bydd y cynllun cyntaf yn sicrhau deunydd hyrwyddo dwyieithog
ar gyfer ymgyrch ddarllen a gynhelir gan y llyfrgelloedd
cyhoeddus dros gyfnod yr haf. Roedd cynllun y Ras Ddarllen,
a drefnwyd gan gwmni LaunchPad, yn llwyddiannus iawn y
llynedd, gyda nifer fawr o blant yn ymweld â’u
llyfrgell leol yn ystod y gwyliau ysgol. Bydd yr arian
ychwanegol yn fodd i gynhyrchu deunydd hybu dwyieithog
ar gyfer y cynllun diweddaraf, Carnifal Darllen, a bydd
y Cyngor Llyfrau’n cydweithio’n agos â
LaunchPad a llyfrgelloedd Cymru i sicrhau llwyddiant yr
ymgyrch yng Nghymru.
Mae’r ail gynllun yn ymwneud â chynllun penodol
i hybu llythrennedd deuol, sef yr arfer o ddarllen a chyfathrebu
yn y Gymraeg a’r Saesneg gan symud yn rhwydd o’r
naill iaith i’r llall. Un o gynlluniau llwyddiannus
y Flwyddyn Darllen Genedlaethol oedd arbrawf a gynhaliwyd
yn Ysgol Bodffordd, Ynys Môn, dan arweiniad y prifathro
ar y pryd, Elfed Williams. Bydd y cymorth a dderbynnir
yn fodd i sicrhau bod y ddau lyfr a gynhyrchwyd yn ystod
yr arbrawf hwn ar gael i bawb. |
|
